MIRI: Kaban Parlimen (MP) Sibuti Lukanisman Awang Sauni minta mensia mayuh ke bisi pengelandik nero datai mantaika penau diri.

Ku iya, dalam perambu pemansang Sibuti sida diatu benung ngiga orang ke bisi ngembuan pengelandik nero ungkup pengawa nero ba Batu Niah, Bekenu, Sepupok enggau Lambir.

“Sapa ke bisi pengelandik enggau pengerindu nyengkaum bisi runding tau ngiga aku lalu ngaga perambu ke lebih agi udah nya,” ku iya nengah penerang ke dibantai nengah akaun media rama iya seharitu.

Tandu Likanisman, pengawa nero ‘mural’ (gambar ba dinding) tu siti ari produk dagang temuai.

Nya alai asil dero ‘mural’ nya endang siti chara dikena matak sida ke rindu ba pengawa ‘art’ ari serata menua.

“Sempat mega ninjau ‘mural’ Gua Niah ke didero lalu meri tepa ngagai orang ke nero nya”.

“Lebuh ninjau utai dero ‘mural’ sempat mega ngambi gambar ambi ke bisi tanda pengingat begulai enggau bala temuai ke bisi datai,” ku iya.

Beduduk ari nya, Lukanisman ngarapka bala pemberita ngerembaika jaku tesau bekaul enggau pengawa ngiga orang ke bisi penau nero.

Sebedau penerebai bilun ari Miri ke Kuala Lumpur pagi tadi, Lukanisman bisi betemu enggau bala raban NGO lalu nyua chek geran sepenyampau RM37,000 dikena sida bejalaika aktiviti gerempung.