DARO: Pengawa ngaga jematan Batang Paloh ukai semina nyadi penyikap ngagai jalai tebing pantai tang mega ngelengkaska pemansnag ba sitak tengah Sarawak.

Menteri Muda Perambu Mengeri, Pengatur Tanah enggau Rampa Menua, Datuk Len Talif Salleh madah, projek ke meri pangka besai nya endang sebagi ari perais perintah ngagai rayat.

Ku iya, pengawa ngemujurka projek nya mega seriris enggau pejalai pelin pemansang penuh ungkup rayat.

“Pengawa tu beguna amat dikena ngemansangka sitak menua pesisir ari semua sukut kelebih agi ba pengawa betanam betupi sereta nyungkak sektor ekonomi ba sitak nya ungkup timpuh panjai.

“Kelimpah Jematan Paloh, pengawa ngaga jalai raya Sarikei-Tanjung Manis, Jematan Rajang enggau Jematan Batang Batang Lassa mega sebagi ari komponen penyikap jalai pesisir ke beratika pengeransing perintah nengeri Sarawak mai pemansang ngagai rayat,” ku iya rambau Pengawa Nasih Tanah Ungkup Jematan Jambatan Paloh di Semop, kemari.

Nangkan nya, Kaban Parlimen Tanjong Manis, Ir Yusuf Abd Wahab madah, jematan Paloh mandangka pengeransing perintah dalam nyendiaka perengkaguna ke pemadu manah ungkup rayat.

Ku iya, perengkaguna nya diperati nyadi penyikap ngagai projek Jalai Besai Pan Borneo ke diatu benung digaga bepun ari Lundu nyentuk utara Sarawak.

“Nya alai projek ke meri pangka besai baka tu endang diining enggau dikeandalka rayat lebih agi raban orang bumai enggau berikan ba sitak Tanjong Manis lebih agi di Pulau Bruit.

“Nya alai, aku ngarika semua rayat Tanjong Manis meri terima kasih ngagai Abang Jo laban chukup mentas enggau nemu pekara ke diguna kami ba sitak tu.

“Arapka nengah pengawa tu, perambu kami deka ngemansangka sitak tu bejalai enggau mujur,” ku iya.

Jematan sepanjai 1.7 kilometer (km) tu deka besambungka Pulau Bruit enggau Tanjung Manis sereta nukar feri Sungai Serdeng enti udah tembu jemah.