KUCHING: Perengkaguna ti lebih meruan deka digaga ungkup pengelantang peranak sitak Kampung Kudei Baru.

Sapit Chairman PBB Pampang Satok Datuk Ibrahim Baki madahka pengawa ngemanahka perengkaguna mensia mayuh baka jalai alun, parit, salur ai enggau jematan ba kampung nya benung diperambu.

“Sebedau tu kami udah ngemanahka perengkaguna ba Kampung Kudei Lama (Renggat Keterubah), udah tu kami deka ngemanahka Kampung Kudei Baru (Renggat Kedua) nyengkaum Kampung Kudei Baru Iban.

“Seraya ngemanahka perengkaguna, dia kami deka mantu nyeruri rumah repuk ti bisi ba kandang genturung pendiau tu,” ku iya.

Ibrahim bejaku munyi nya lebuh ngelawa dua buah rumah ti udah tembu diseruri ba Kampung Kudei Baru ditu, kamari.

Kenu ku iya, infrastruktur kandang menua nya deka majak dikemanah ungkup pemaik peranak kampung ngambika sida ulih diau sereta idup nyamai baka orang bukai.

“Mayuh rumah deka diseruri ba kandang menua tu, tang kitai ngatur begintir nitihka peminta ti pemadu dulu.

“Ba baruh agih belanja PPRMS sebuah rumah diseruri enggau ungkus belanja RM50,000.

“Nyadi ba Kampung Kudei Baru tu, urung 52 buah rumah udah diseruri dalam taun tu,” ku iya.

Bejaku pasal dua buah rumah ti dilawa iya kemari, Ibrahim meri besai terima kasih ngagai semua piak ti udah besaup mantu ruang bilik nya.

“Kitai udah mantu tudah Methew Singka ngaga rem (jalai semin dikena kerusi roda OKU), bilik agu (dua agu khas ungkup Methew enggau bini iya) enggau siling rumah iya.

“Ba rumah ti kedua, kitai mantu tudah Hussin Narudin ngaga atap rumah iya ti tiris, dinding belubang enggau ngaduka rumah ke udah singit,” ku iya.

Sama bisi datai kemari Sekretari Politik Kepala Menteri Abdul Samad Gani enggau bala bukai.