DARO: Sepenyampau RM22.2 juta agih belanja dikemendar dikena ngemujurka sekeda projek baru ke deka meri pemaik ngagai rayat di sitak Dun Semop.

Pekara nya dipansutka Kepala Menteri, Datuk Patinggi Abang Johari Tun Openg pengudah mendingka peminta Adun Semop, Abdullah Saidol rambau Pengerami Bejadi Pengawa Ngaga Jematan Paloh kemari.

Projek nya mungkur Projek Ngetar Jalai Kebun ari simpang Sungai Nai nyentuk ke Penuai sepanjai 10 kilometer (km) ke dipelaba beungkus RM7.2 juta, Projek Jalai 1km ari Jalai Kebun ke Jalai Tar di Kpg.Penuai-kos beungkus RM3.6 juta, agih belanja tambah dikena ngaga jalai ke Mupong ari Simpang Sibu/Tjg.Manis- RM3 juta, Projek Ngetar Jalai Sedi-Sebako sepanjai 5.4 km (dipelaba beungkus RM5.4 juta) enggau RM3 juta ungkus tambah dikena ngaga tiga buah Mesegit.

Beduduk ari nya, Abdullah ke mega Menteri Muda Pekara Korporat enggau Ukas madah, pekara nya udah tentu meri pengaga ngagai rayat lebih agi di sitak Pulau Bruit.

Semua perengka guna nya ku iya, beguna amat ungkup rayat ba Dun Semop ke tebal agi orang bumai enggau berikan.

NINGA PENERANG…Abang Johari begulai enggau bala pemesai bukai mendingka penerang sebedau bejadika Pengawa Ngaga Jematan Paloh di Pulau Bruit, Semop.

“Perengkaguna ke lebih menyana baka jalai raya ulih ngangkatka penau sektor ke bekaul ba Dun Semop,” ku iya.

Iya madah, pengawa ngaga Jematan Batang Paloh mandangka pengeransing perintah dibaruh GPS dalam ngemansangka menua pesisir.

Kenu ku iya, projek ke meri pangka besai tu deka nyadi penyikap ngagai projek ngaga jalai raya lebih agi ba sitak menua pesisir.

Abdullah mega minta diperundingka perintah ngaga enggau ngengkahka mayuh palan latih ke bekaul enggau industri kayu ramu enggau kapal.

Ku iya, tu nyengkaum palan latih betanam betupi enggau berikan ba zon tengah lebih agi ba Tanjung Manis tauka ba Pulau Bruit.

Jematan Batang Paloh deka nyadi jalai besai besambungka genturung pendiau ba sepanjai jalai pesisir baka Semop, Sedau, Bekakong enggau Tanjung Manis lalu nya deka nukar pengawa ngena servis feri baka ke diatu.

Projek nya dipelaba beungkus RM298 juta sereta dipelaba tembu dalam timpuh dalam 48 bulan.