SARATOK : Siku balu dianggarka rugi besai urung RM17,000 pengudah perabung rumah iya tekebu dipangka kabut lemai kemari.

Peranak Rh Jemat Garak, Nanga Malong ke dituntung penusah nya, Mampu Anak Beti, 58 madah penusah nyadi urung pukul 5.00 lemai nyerumba ujan bangat.

Bekau ari penusah nya ngujungka kasau atap enggau ring perabung rumah iya ‘terebai’ kira takah tiga pintu penyauh sebedau terengkah ba tengah laman rumah panjai sida.

“Puji Tuhan,petara agi nyangkung kami sebilik sereta orang bukai ke ditu, nyema bisi bala bukai bakal tauka bebadi tentu pekara tu tau nyadi penusah berat nuntung kami serumah.

“Asaika deka luput sereta temati kutu lebuh ninga panjung orang ke berimbai bilik enggau aku madahka atap sadau aku nadai agi udah tekebu kasak kabut.

KUR SEMENGAT…Puji Tuhan nadai orang bakal bekau penusah nya.

“Maya penusah nyadi, aku benung ngusung kami serumah ba bilik bukai enda jauh ari bilik aku empu sereta enda sedarka pekara ti bisi nyadi ba bilik penaik diri,”ku iya maya dirandau pemberita tadi.

Taja pia penyadi penusah bedau diripot ngagai piak bekaul naka berita tu dikarang.

Ba sebengkah agi penusah ke nyadi ba urung jam ke sama, Opis Bomba enggau Penyah Penusah (Bomba) Pampang Saratok bisi nerima kanggau pasal pun kayu tumbang di Rh Malong, ditu.

Penusah tu ngujungka peranak dua buah rumah panjai ke bela nengah jalai ke sebaka nyau tepagang urung sejam ba palan penusah nyadi.

Ketuai Bomba Saratok,PPgB Nazry Mohamat, madah bisi tujuh bomba ngesah penusah nya betuaika PBK II (KUP) Mahda Bin Haji Mos urung pukul 5.18 lemai nya.

Sama bisi ngesah penusah tu staf ari Ejensi Pemekal Kuasa Karan (SESCO) Pampang Saratok.

KAYU TUMBANG…Raban bomba benung netak dan kayu ti tumbang lalu ninggang tali karan.