SPAOH: Sapit Kepala Menteri Datuk Amar Douglas Uggah Embas nangkan bala pengundi anang teperasa enggau sekeda piak ti udah bejalai nyadung danji bulan enggau bintang nyerumba Pengawa Bepilih Nengeri ke-12 (PRN-12).
Ku iya, udah bisi chalun penyakal bejalai seraya nyadung berita bula, bejaika pengari rayat enggau Perintah Gempung Parti Sarawak (GPS).

“Diatu, kita (pengundi) berengkah meda sida bejalai seraya nyadung danji ngambi ulih menang maya PRN ila.

“Tang mesti ingat, sida deka lenyau pia aja enti alah tang kami ti nyadi parti merintah seruran mantu kita nadai ngira musim pengawa bepilih tauka enda ngambi nyendiaka servis pemadu manah ngagai kita,” ku iya nerang, ditu kemari.

Adun Bukit Saban nya ningkah jaku ngumbai sitak Penom enggau Gensurai aja diberi pemansang.

“Jaku sida nya chukup bula besai laban projek pemansang udah lama dipejalai ke pemaik semua.

“Kitai deka ngembuan STOLport beungkus RM108 juta di Bebuling ngambi nyerungkai pengulih besai nyadi Tibang PemakaiBetong-Sarikei.

“Aku andalka mensia mayuh ti napi penusah ba pengawa betanam betupi deka bulih untung.

“Ba Bukit Saban kelebih agi di Spaoh benung digaga Kompleks Lumba Spaoh beungkus RM14 juta, projek tebing sungai Spaoh beungkus RM6.2 juta, pasar baru RM5 juta, jematan baru beungkus RM30 juta.

“Baka nya mega enggau Jalai Spaoh ti deka diseleti lalu Sekula Sekondari (SMK) Spaoh deka dikemanah.

“Nambahka nya, bulan nyin kemari kitai ngemata pengawa muka Stesyen Betanam Betupi Spaoh ti beungkus RM3.5 juta,” terang Uggah ti mega Menteri Betanam Betupi Moden, Tanah Adat enggau Pemansang Kandang Menua.

Uggah madah, sida diatu fokus mantu komuniti nambahka penatai pemisi nengah aktiviti betanam betupi chara moden.

“Penyakal deka nuduh bemacham pekara sereta mantaika jaku bula dikena ngelabuhka aku enggau Perintah GPS.

“Taja pia, aku pechayaka pengundi udah tentu nemu pemendar ari pemula dibantaika sekeda piak nya.

“Nya alai, aku ngansak kaban PBB mesti sedia mantah semua isu ti dibantaika sida,” ku Uggah madah nyemetak.

Ba lansa bukai, Uggah madahka konvesyen mit ti deka diatur ditu disadang dipejalai bulan siti tu ila enggau dipenyadi Kepala Menteri Datuk Patinggi Abang Johari Tun Openg.