KUCHING: Pelilih Bintulu bebali ari status gadung nyadi kuning pengudah dua kes ngaul peranak menua tu dirikodka, ditu.

Sapit Kepala Menteri Datuk Amar Douglas Uggah Embas madah, Pelilih Kuching mengkang status kuning taja bisi lima kes dirikod.

“Ari empat kes ngaul peranak menua tu diripotka ba timpuh 14 hari ke udah pengudah nambah tiga kes baru baru seharitu, Pelilih Kuching mengkang status kuning.

“Tu ngujungka dua buah pelilih status kuning naka seharitu enggau bisi 38 buah pelilih bestatus gadung,” ku iya ti mega Chairman Komiti Penyangga Penusah Ngenyit Nengeri (JPBN) Sarawak.

Uggah mansutka jaku nya ba aum pemberita Covid-19 ba Begunan Dun Lama, seharitu.

Terang Uggah, bisi enam kluster agi ngerekai ngaul 60 iku.

“Tu nyengkaum Kluster Syarikat Kejuruteraaan (lapan kes), Kluster Mambong (tujuh kes), Kluster Sentosa (31 kes), Kluster PUI Melbourne (tiga kes), Kluster Pasar Satok (empat kes) enggau Kluster Alam, Bintulu (tujuh kes),” terang iya.

Nambahka nya ku iya, nadai kes baru ti udah suman enggau dikemendar pansut ari sepital ngujungka kes positif Covid-19 ti udah suman enggau dikemendar pansut ari sepital mengkang 662 iku tauka 95.11 peratus.

“Bisi 15 iku agi diperubat ba wad isolasyen sepital nyengkaum semilan iku ba Sepital Bintulu, empat kes ba Sepital

Besai Sarawak (SGH) seraya bela siku ba Sepital Sibu enggau Sepital Miri.

“Bisi lima PUI baru diripotka enggau lima lima kes PUI agi nganti pemutus makmal,” ku iya.