DARO : Kuala Paloh ti bepalan enda jauh ari Tanjung Manis ditemu nyadi palan baru endur ngemansangka palan industri kapal.

Kepala Menteri Datuk Patinggi Abang Johari Tun Openg madahka, pengawa nya seriris enggau chara perintah deka ngemansangka agenda industri kapal kelimpah ngaga Sarawak nyadi nengeri maju jemah.

Ku iya, perintah pechaya industri kapal ngembuan peluang besai dikemansangka nengah penemu baru nyengkaum injinir marin.

“Palan ba pengeluas 2,000 ekar deka diguna ungkup tuju tu. Palan nya ila di Kuala Paloh. Kelimpah injinir marin, palan nya deka nyadi palan nyeruri enggau ngatur kereja ti bekaul enggau kapal,” ku iya ngagai media pengudah bejadika Projek Ngaga Jematan Paloh kena 22 Ogos (Hari Enam) tu tadi.

Iya mega madahka, perambu timpuh panjai nya deka nyendiaka peluang ekonomi baru ngagai rayat tang begunaka pansik ti dalam sebedau dipejalai.

Berebak enggau nya, iya madahka perintah mesti ngaga perengkaguna pemun ke nyadi pekara pemadu beguna dalam nyukung pejalai projek ti meri pangka besai baka tu.

“Kebendar iya kitai udah bisi perambu ari sebuah serikat ungkup ngemansangka palan penyangkai kapal. Nya nyadi tanda industri kapal ngembuan peluang ti besai ngerembai seriris enggau penumbuh palan penyangkai kapal di Tanjung Manis,” ku iya.

Kelimpah ari nya, iya madahka perintah mega merambu deka negapka sektor betanam betupi enggau pengawa berikan di Delta Rajang baka nyendiaka mayuh perengkaguna dikena ngemuntangka sektornya ngeluarka produk.

“Pulau Bruit endang bisi peluang mekalka produk pemakai dalam ngemansangka industri pemakai ti selamat,” ku iya.

Iya madahka pengawa ngaga Jematan Batang Paloh sebagi ari pengawa pemadu beguna dikena nyapai tuju nya.

“Siti chara pemadu beguna ti ulih dikemuntangka nengah jematan tu ila iya nya nyendiakan bekal ai laban kitai ulih ngengkah batang paip besai ba atas iya. Chara tu ukai semina ngemuntangka pengawa nyeruri tang iya mega jimat.

“Aku ngarapka peranak menua udah besedia nerima ubah pemansang ti deka dipejalai tu. Anang semina nyadi orang ti meda aja tang kitai mesti ngerebut peluang nambahka tikas ekonomi diri empu,” ku iya.

Dulu ari nya, Abang Johari madahka Jematan Batang Paloh ti benung digaga nyadi bukti Perintah Sarawak enda bejaku puang.

Iya ngaku pekara nya ukai muntang tang asil ari pengeran enggau perambu ti manah ari perintah, projek nya pengujung iya udah ulih dipejalai.