KUALA LUMPUR: Penyerakup bansa beguna amat nyadika tiang pandung sesebengkah menua sereta nentuka menua seruran tegap ari semua sukut.

Sapit Menteri Pengeluar Kuasa enggau Pengeraja Asal, Ali Biju madah, tu seriris enggau batang tuju Kongres Negara iya nya ngempung rayat Malaysia ngambika seati lalu ulih segulai sejalai.

Ku iya, menua Sarawak diuan pupu bansa ti diau bebaik enggau pangan diri nyadi chunto pemadu manah mandangka reti penyerakup kebendar.

“Kitai bisi orang Melayu Sarawak, Melanau, Iban, Bidayuh, China, Orang Ulu, India enggau 32 etnik ke bukai ti udah lama idup begulai enggau pangan diri.

“Taja bebida jalai pengarap, asal penatai nyentuk pemakai, tang rayat Sarawak nadai kala charut enggau pangan diri lalu bida nya diangkat nyadika penyelai dikemegah sida,” ku iya.

Ali mansutka jaku nya lebuh bejaku ba mua mayuh beserimbai enggau Kongres Negara ba Palan Mandang enggau Dagang Entarabansa Malaysia (MITEC) ditu, malam kemari.

Iya madah, idup bebaik dalam pengelain tu udah nyadi tiang pemun ba pengidup rayat Sarawak kenyau ari taun 1963 suba.

“Nya kebuah aku chukup temegah meda pemanah kaul serakup enggau ulah bebasaka pangan diri dikemeranka rayat Sarawak lalu patut nyadi teladan ngagai peranak nengeri bukai.

“Penyerakup tu kunchi menua likun, lantang enggau nyapai pemansang jemah. IDUP SARAWAK! MAJU MALAYSIA!” simpul Ali.