SARATOK : Pemutus Menteri Muda Pengeluar Kuasa enggau Pengeraja Asal Ali Biju ke udah nyemetak madah diri masuk Parti Pribumi Bersatu Malaysia (Bersatu) nerima timbal positif ari bala penyukung iya.

Pemutus Kaban Parlimen Saratok ke mega Adun Krian nya diterangka ngagai mensia mayuh rambau Program Kongres Negara ba Palan Mandang enggau Dagang Entarabansa Malaysia (MITEC) Kuala Lumpur malam ensana.

Ba penemu Kaunselor Roland Angking,53 ari Rumah Ragai Temedak Gelang,Kabong madah penemu Ali netap diri masuk Bersatu sigi manah,tambah mega maya pegai Perintah Pakatan Harapan (PH) suba nadai siku menteri bansa Iban dichiri nyadi menteri tauka sapit menteri.

“Nya alai ba aku, pemutus iya netap diri enggau Bersatu siti pemutus ti engkeman laban ba Perintah Pakatan Nasional (PN) diatu iya udah mujur nyadi siku ari Iban dipadu nyadi sapit menteri.

“Ari nya mega tentu meri peluang besai endur iya bulih agih belanja dikena ngemansang ke sitak dipegai baka Saratok.

“Udah tentu tu ukai pemutus ari buah runding dalam sehari dua, tang endang udah lama diperundingka iya empu sereta aku mega pechaya pemutus tu endang ketegal ari tuju iya ti enggai agi meda rayat baruh iya merinsa tinggal pemansang ketegal dibai iya nyakal ngelama tu,”ku iya.

Nangkan nya, Kaunselor Edmund Uda Maleng,52 ari Sungai Berangan Panjai ditu madah endang gaya kitai maya bepolitik, sigi tau betukar parti nitihka ubah politik kemaya hari.

“Tang aku ngarapka tu ukai pemutus digaga bekaul enggau pengawa Bepilih Besai Kaunsil Nengeri Sarawak (PRN-12) ti deka datai.

“Laban ba aum ketuai parti enggau Menteri Besai apin lama endang udah nyemetak setujuka semina chalun ari Gempung Parti Sarawak (GPS) aja tau bediri dalam PRN,”ku iya.

Udah nya Howard Bunsu Resik,32 ari Rumah Ason,Tembawai Kapok, Awik madah pemutus Ali nya chukup engkeman enti dipeda ari sukut pemansang.

“Sekumbang iya udah nyadi sapit menteri mayuh amat pemansang diagih ngagai rebak baru lebih agi ba menua pesisir.

“Arapka nengah ‘perau baru’ tu iya nyamai agi meretika agi penanggul ke ditapi rayat lalu ulih mutar enggau manah ke pemaik kami ke nembiak,” ku iya.

ROLAND ANGKING

 

EDMUND UDA MALENG

 

HOWARD BUNSU RESIK