BARAM: Projek nyambung Bekal Kuasa Karan Menua Pesisir (RES) Renggat Keterubah enggau pengawa nyeleti jalai ba Long Sepiling benung chakah dipejalai.

Menteri Muda Kaunsil Kandang Menua enggau Pengawa Berumah, Datuk Penguang Manggil minta semua piak meri kerejasama ngagai ejensi ti bejalaika projek pemansang dia.

Ku iya, kerejasama semua piak beguna amat nentuka pejalai projek nya lanchar lalu rayat ulih ngasaika pengelantang.

“Tabi puji ngagai KK Seman Anyie laban mujur ngembing peranak Long Sepiling ditu meri kerejasama tegut ngagai aku lalu besaup gawa ngemujurka pejalai projek pemansang ditu.

“Kerejasama kita ngemuntangka pengawa aku mai pemansang kitu baka dikedeka enggau dipinta kita sebedau tu,” ku iya.

Penguang mansutka jaku nya rambau Pengerami Adat Istiadat enggau Makai Selamat Pengawa Nyiri Ketuai Bansa Kayan di Long Sepiling, KK Seman Anyie, pagi ensanus (22 Ogos 2020).

Iya madah, sida sebuat laun datai ba endur dituju laban limpang lalu ngetu ngabas projek nyeleti jalai enggau nyambung tali karan ba sepanjai rantau jalai.

“Minta ampun ngagai semua kelebih agi orang ke ngempu pengawa sehari tu laban kami sebuat laun ngenataika diri tadi.

“Ukai sengaja ngerindang diri tang ngena awak tu ngabas enggau ngemataka pengawa bala kunteriktor ke nyeleti jalai enggau nyambung bekal kuasa karan.

“Kala ke mansa, nya kami sebuat lalu ngetu enda lama dia tadi,” terang Penguang madahka kebuah sida laun datai.

Ngena peluang nya, iya meri besai terima kasih ngagai bala ke lurus ati enggau semampai nyukung pengawa iya ngelama tu.

Berebak enggau nya, iya ngemendarka agih belanja nyeleti rumah penyampau RM53,000 enggau Projek Mit Pemansang Menua Pesisir (MRP) penyampau RM20,000 ngagai Komiti Pemansang enggau Pengelikun Genturung Pendiau (JKKK) Long Sepiling seraya Biro Indu nerima RM5,000.