KUALA LUMPUR: Semangat talukka menua endang patut dikembuan genap iku rayat Sarawak lalu udah nyadi sempekat bala bujang berani lebuh berambunka nyawa ngetanka menua kenyau ari kelia.

Sapit Menteri Pengeluar Kuasa enggau Pengeraja Asal, Ali Biju madah, tebal agi rayat Malaysia ke diau di semenanjung enda nemu Sarawak udah dulu nyapai merdeka kena 22 Julai 1963.

Ku iya, Sarawak begulai enggau tiga wilayah bukai, Sabah, Singapore enggau Malaya lebuh nya numbuhka Serakup Malaysia kena 16 September 1963, kurang dua bulan pengudah Sarawak merdeka ari pegai British.

“Kami ari Sarawak meri besai terima kasih ngagai Menteri Besai Tan Sri Muhyiddin Yassin enggau bala menteri kabinet bukai laban limpang ngatur ngintu Hari Sarawak 22 Julai nyin tadi, dalam chara baru.

“Taja pengawa tu diatur enggau rumpas, tang mai reti chukup besai ngagai kami rayat Sarawak laban tu nunjukka basa bala ketuai menua ngagai Tanah Kenyalang,” ku iya lebuh dirandau Suara Sarawak pengudah Kongres Negara ba Palan Mandang enggau Dagang Entarabansa Malaysia (MITEC) ditu, malam kemari.

Ali nyemetak madah, menua Malaysia mega deka nadai enti nadai menua Sarawak enggau numbuhka menua nya.

“Tang kita anang irau tauka nangi, darah bujang berani Sarawak ti talukka menua tu semampai dikembuan kami.

“Penaluk anak Sarawak tetap begulai enggau menua Malaysia tu,” tandu iya.

Ku Ali, udah mayuh jasa anak Sarawak ngagai menua tu nadai ngira ari sukut politik, lumba, industri muzik enggau ngetanka pengelikun menua kenyau ari jeman menua sigau kelia.

“Kitai bisi Watson Nyambek, kala megai rikod jaguh belanda ba menua Asia Tenggara. Kitai bisi Pandelela Rinong, atlit terejun menua ti udah dua kali menang midul Olimpik sereta lima midul ba Pekit Dunya.

“Kitai temegahka siku jaguh gumpal isi Malaysia, niang Bujang Taha ti kala megai gelar Mr. Asia empat kali dalam taun 1980, 1982, 1983 enggau 1986. Kitai mega bisi Hafiz Suip, penanyi tebilang ari menua Kuching enggau Zee Avi, penanyi entarabansa ari Sarawak.

“Kelimpah ari nya, kitai bisi Mee Kolok enggau Laksa Sarawak, ti udah diaku dunya kulinari entarabansa sereta pemakai asal ari pupu bansa ke bukai ti nyadi produk dagang temuai ke Sarawak,” terang iya silik.

Arapka anak Sarawak terus meri sukung nadai bebagi ngagai bala ketuai ti megai perintah besai diatu, semampai begempung nyadi bansa Malaysia ti tegap.