PEMERINSA JEMAN JIPUN

TUSUN 1

Umur udah manggai lebih 100 taun ngujungka Buja Anak Dabong asal ari Rumah Inchang Lagor, Skirau Ai, Lingga diatu nyau enda berapa regas.

Kelia, Buja siku orang ke chukup berani sereta kering megai senyata lalu nadai nangi betempuh enggau munsuh.

Nya kebuah, anak iya benama Ipi mega bisi nusika kenang pasal apai iya Buja maya ngelaban munsuh kelia.

Mualaika pengingat maya menua agi siga, Buja madahka pengidup kelia chukup merinsa maya dikuasa perintah Jipun.

SENYATA… Ilang ti suah dikena Buja nurun ngayau kelia.

“Lebuh menua dipegai Jipun kelia, pengidup ba jeman nya tau disebut kitai baka diau ba utai ti petang, seruran takut sereta meda rayat kena perinsa bala Jipun.

“Buah tanah enggau asil padi abis dirampas sida magang ngujungka peranak ditu balat merinsa dipenyati.

Nambahka nya, iya madahka bala nembiak jarang pansut ari rumah ketegal nangika diri ditaban orang Jipun.

Terang iya, bala Jipun kelia nadai ati kasih menyati enggau ngerampas utai ditanam peranak.

DINDING BULU

AGI MANAH… Sarung ilang ke agi manah taja udah lama kelimpah tali aja ke udah ditukar.

Buja mengkang ngibun ilang ke kala dikena bedengah pala munsuh.

Lebuh dirandau Suara Sarawak pasal ilang, Buja madahka ba tusut peturun sida iya orang lumur dua ngibun enggau ngayau ngena ilang nya.

Lebuh beratika pendiau ilang ke lama disimpan nya enggau tuai ari umur Buja diatu, ilang enggau sarung nya agi manah lalu semina tali aja ditukar ketegal udah retai.

Berebak enggau nya, ilang tu tadi ditanchang begulai enggau rajut sereta taring jani.

Ku Buja, rajut nya nyadika pengaruh ngambika kebal maya betempuh enggau munsuh.

“Ilang tu mih dikena aku lebuh ngelaban orang Jipun ba Engkilili lalu ilang tu mayuh udah bulih dengah bala pala Jipun kelia.

Nya alai, ilang ti kala bedengahka pala munsuh ngasi amat dikena ngubat penyakit kayap.

ATUR SEBEDAU NGAYAU

“Nyadi kelia, kami besemaya nurun ngayau nitihka simpul tali ba bulu manuk nya ngambi sereta mudik nyerang orang Jipun.

“Enti tali ba bulu manuk nya ditanchang tiga kali, tu bereti ba hari ketiga kami nurun ngayau.

Ngenang baru pengidup lebuh ngelaban orang Jipun kelia, Buja madahka sida sekaban semina makai belauk budu aja pengelama tiga hari bejurut.

“Siku ari bakih aku benama Jampong teulihka runding mai kami munuh jani China ba Engkilili ketegal nyau leju makai belauk budu.

“Barang sapa ti munuh jani deka bela ampit makai dagin jani,” ku Buja nerang madahka sida deka bebagika dagin jani nya.

REBAK DIATU BETUAH

Ba pengujung randau, Buja madahka rebak diatu chukup betuah laban ulih diau lantang senang laban nadai penyarut nyadi.

Iya mega nangkan rebak dudi seruran ngenanka penyerakup dikembuan kitai diatu laban iya udah ngasaika pemerinsa dipegai Jipun.

Soldadu Darat Ke-25 Jipun nyerang Tanah Malaya kena 8 Disember 1941 sereta nyerang Borneo Utara enggau Sarawak kena 1 Januari 1942.

Ba timpuh nya, pengidup peranak menua tu chukup pedis sereta seruran nangi kelimpah kedua kena perinsa enggau nyadi ulun sida ngereja bemacham pengawa berat.