KUALA LUMPUR: Opis Menteri Dalam Menua keran mantu komuniti ba menua pesisir ngambika bisi status peranak menua.

Sapit Menteri Dalam Menua I, Datuk Seri Ismail Mohamed Said madah, opis menteri iya enggau unit mindah kin kitu (mobile) sida seruran ngabas ba Program Menyemai Kasih Rakyat (Mekar) ngambi mantu peranak dia.

“Tu udah nyadi juluk perintah nentuka genap iku rayat ba menua tu diaku nyadi peranak menua.

“Nya alai, kami deka berandau enggau Opis Pelajar, Perintah Sarawak enggau ketuai komuniti nentuka nadai rayat dikelaung ari bulih hak sida,” ku iya.

Ismail mansutka jaku nya lebuh nyaut tanya tambah Kaban Parlimen Hulu Rajang Datuk Wilson Ugak Kumbong ba Aum Parlimen, ditu tadi.

Ku Ugak, agi mayuh peranak asal Sarawak kelebih agi ba kandang menua Hulu Rajang baka ba Long Singut, Batu 20, Batu 19 enggau Batu 18 di Jalai Bakun agi bisi penanggul nadai tingki mirah enggau gadung.
“Pekara tu nanggul anak sida besekula kelebih agi maya peresa besai perintah ba Pom Lima enggau Pom Enam,” terang iya.