KUCHING: Opis Servis Transfusyen enggau Bank Darah Sepital Besai Sarawak meransang mensia mayuh nyukung Kimpin Meri Darah diatur sida.

Piak Sepital Besai Sarawak (SGH) ngarapka kimpin tu mujur ngambika bekal darah semampai chukup.

“Diatu Bank Darah ba sepital tu suntuk bekal darah A + lalu begunaka bekal darah ninting hari.

“Nya alai kami minta kasih mensia mayuh datai lalu meri darah dikena nyaup mutarka penanggul tu,” ku penerang nya.

Ungkup penerang, endur, hari bulan enggau jam ulih datai meri darah baka udah ditetap piak sepital.

Mensia tau datai kena 29 Ogos (Hari Enam) berengkah ari pukul 10 pagi nyentuk 3 lemai ba Ringkat 1 Kuching Sentral, 30 Ogos ba jam ke sama ba Boulevard Shopping Mall.

Kimpin dua hari berunggu nya diatur piak Bank Darah SGH.

Raban volunteer mega bisi ngatur Kimpin Meri Darah berserimbai enggau Hari Merdeka ba Emart Tabuan Jaya berengkah ari pukul 10 pagi nyentuk 3 lemai.

Penerang enggau tanya silik tau telefon ngagai numur 082-276797 (Opis) tauka nuju Borhan ba numur 010-8576909.