SARATOK: Rumah Panjai Wong Besi ditu udah nerima empat unit kereban pengerara api ari Palan Servis Komuniti Sitak P205 Saratok.

Sapit Menteri Pengeluar Kuasa enggau Pengeraja Asal, Ali Biju madah, genap rumah panjai tauka rumah nyembuah endang patut disikap ngena kereban pengerara api.

Ku iya, kereban tu beguna amat laban ukai semina ulih nagang penusah ari majak besai tang mega ulih nyeliahka penusah bebadi nyawa enggau lenyau keresa.

“Bisi 120 kes rumah panjai angus diripot nyadi bepelasarka Ripot Perangkaan enggau Statistik Rumah Panjai Angus di Sarawak Ungkup 2015 ngagai 2020 (naka 31 Julai) ari Opis Bomba enggau Penyah Penusah Malaysia (JBPM) Sarawak.

“Nya kebuah kitai naka ulih bejalaika pengawa nagang enggau nyikap diri napi sebarang penusah ke tau nyadi sebarang maya laban penusah datai ukai nya berauh baka ujan,” ku iya.

Jaku Ali nya dipansutka pengari iya lebuh pengawa nyuaka bantu kereban pengerara api ngagai Tuai Rumah Dickson Sujang ba Palan Servis Komuniti P205 Saratok, pagi kemari.

Iya madah, ari penerang dipansutka JBPM nya mega, akses tauka pejalai bomba ngelawa endur penusah angus mar baka jalai sungai, menua bebukit enggau nadai jalai ke meruan ulih ditengah.

“Nya alai aku fokus ngagai bantu kereban pengerara api ngagai rumah panjai kelimpah ari palan bukai baka tabika, sekula enggau rumah nyembuah nitihka peminta.

“Nengah bantu tu, aku ngarapka diri ulih mantu peranak dia bisi kereban dikena nyaga pengelikun lalu nyadika penabat sida serumah,” tandu Ali.