MIDDLESBROUGH: Berat tubuh indai beranak tiga nurun ngenyit ngagai 35 kilogram (kg) pengudah iya ninting hari makai nugget manuk kenyau ari empat taun ke udah.

Michaela Harris, 26 taun, madahka diri milih makai laban pemakai bukai ngasuh iya jeluak lalu mutah, kelimpah ari nugget manuk nya.

Indu nya berengkah makai nugget manuk kenyau ari taun 2016 pengudah putus pengerindu ngujungka iya tusah ati sereta merampau, ku Mirror.

Michaela ngetu makai pemakai baka dagin enggau ikan pengudah beselara enggau pangan iya dataika rujut, lenyau 16kg dalam timpuh tiga bulan.

Taja pia, indu ke asal ari Middlesbrough, England nya irauka tiga anak iya benama Isabella, 7 taun, Jacob, 5 taun enggau Isla Rose, setaun, deka nunda ulah iya nya.

“Aku irauka bala anak deka nunda ulah aku nya. Anak aku ke pengkuan udah nemu milih pemakai lalu semina minta (deka) makai nugget manuk aja diatu.

“Utai tu balat dikenangi aku laban bala anak begunaka pemakai ti ngundan nutrisyen,” ku iya.