KUCHING: Pengawa nyeleti Klinik Pengerai Long Lama deka berengkah dipejalai ujung bulan tu, pia ku Sapit Menteri II Datuk Aaron Ago Dagang.

Ku iya, agih belanja nyeleti klinik nya udah dikemendar kena 3 Julai tu tadi enggau kunteriktor bejalaika pengawa nyeleti mega udah dipilih.

“Naka diatu, piak kunteriktor begunaka awak mai entukar berat enggau kereban ngaga klinik ngagai sitak nya,” ku iya.
Aaron mansutka jaku nya lebuh nyaut tanya Kaban Parlimen Baram Anyi Ngau ba Aum Parlimen, Putrajaya, ditu kemari.

Ba Aum Parlimen nya, Anyi nanya pasal timpuh ngepunka pengawa nyeleti Klinik Pengerai Long Lama enggau berapa agih belanja dikemendar.

Iya mega madah, klinik pengerai nya nyendiaka servis ngagai 20,000 peranak ba sitak nya lalu pengawa tu mesti dipejalai enggau lengkas ngambi ulih nyendiaka servis baka ke diatu.

Ba lansa sama, Aaron madahka projek nyeleti klinik pengerai nya entara projek besai laban ngaul pengawa ngaga selapat dikena mutarka penusah tanah tusur.

“Penusah tanah tusur ba klinik nya ngujungka klinik ditutup enggau servis dipejalai ba Balai Raya Mensia Mayuh Long Lama.

“Projek tu besai belanja enggau begunaka tinda sebut harga. Dokumen udah tembu digaga deka dianjung ngagai Opis Kereja Raya (JKR) Sarawak kena 28 Ogos ungkup pengawa tinda,” terang iya.

Terang iya, Opis Menteri Pengerai Malaysia (KKM) sedarka penusah ke suah nyadi ba Klinik Pengerai Long Lama enggau sekeda projek deka dipejalai ba sitak nya.

Tu nyengkaum melakin baru jalai ngelawa rumah staf klinik laban jalai nya mesti diseleti.