MIRI: Bisi 123 iku Ketuai Raban Bansa nerima surat chiri pengudah dikemendarka Komiti Bepilih Renggat Bagi Menua.

Pengawa nya dipenyadi Kepala Menteri Datuk Patinggi Abang Johari Tun Openg ba sebuah hotel tebilang, ditu ensanus.

Iya madah, seagi Gempung Parti Sarawak (GPS) dipilih nyadi perintah, pengelurus ba atur pengawa ti udah bisi enggau diaku kenyau ari jeman Brooke deka ditan ari dikachau piak luar.

“Sida mesti ingat, atur pengawa kitai jauh bebida ari Semenanjung, “ku Abang Johari.

Abang Johari madah munyi nya bekaul enggau pengawa Perintah Pakatan Harapan (PH) ti udah megai menua pengelama 22 bulan nguji ngachau atur pengawa Sarawak nengah Komiti Pengatur Komuniti Genturung Pendiau (MPKK).

Iya mansutka jaku nya lebuh Bejadika Pengawa Nyukar Tanah Seksyen 18 Kanun Tanah Sarawak ba sitak Sungai Ukat, Bario.

“Tu mih pengeran kami (GPS) ngambi ngetanka hak nengeri,” ku iya.

Nambahka nya ku iya, sebedau PH labuh, Istana Negara udah telefon ngagai iya ngambi madahka pemutus GPS ti menggi tanggungpengawa besai milih Menteri Besai Malaysia baru lebuh nya.

“Pekara tu nunjukka kitai (Sarawak) ngembuan tanggungpengawa besai dalam Malaysia,” terang Abang Johari.