MIRI: Sarawak ngembuan pangku pengawa besai nentuka penegap menua lebuh Tun Dr Mahathir Mohamad nganjung surat ngemaduka diri nyadi Menteri Besai Malaysia ba bulan Februari taun tu tadi.

Kepala Menteri Datuk Patinggi Abang Johari Tun Openg madah munyi nya pasal pekara ke nyadi lebuh Malaysia nadai perintah megai pengudah Menteri Besai lebuh nya ngenyit ngemaduka diri.

“Nya kebuah, lebuh nya kitai udah pansut ari Barisan Nasional (BN) lalu numbuhka Gempung Parti Sarawak (GPS) lalu sida minta penemu ngagai kitai nentuka Menteri Besai baru.

“Lebuh nya, aku ba Belaga maya nerima kangau ari Istana Negara minta penemu GPS,” ku iya.

Abang Johari mansutka jaku nya ba Pengawa Nasih Tanah Palan Komuniti Begulai Taman Jelita Off Taman Tunku, ditu ensanus.

Nambahka nya ku iya, rayat ditu idup senang lantang taja Sarawak diuan pupu bansa enggau pengarap.

“Sarawak nyadi chunto nyentuk Menteri bukai nanya, baka ni kitai ulih numbuhka Unit Pekara Pengarap Bukai (Unifor).

“Nya siti pekara ke manah ba kitai lalu kitai deka muntang gawa enggau berunding lebuh ngemansangka menua ti likun,” terang Abang Johari.

PROJEK RAYAT… Abang Johari disempulang bala bukai ngabas taba projek Gerija St. Barnabas Taman Tunku.