BINTULU: Anak serikat Petronas di Bintulu udah ngabas 56 iku nembiak ti dituntung penusah ketegal penusah buding angus di Sekula Primari (SK) Sebauh, ditu ensanus.

Anak serikat Petronas LNG 9 Sdn Bhd, Gerup Serikat LNG Malaysia enggau Petronas Carigali Sdn Bhd – Sarawak Gas udah nganjung katil, pua, panggal, selap tilam, sengkabung mua, mesin basu, beg sekula enggau ke bukai ngagai bala nembiak nya.

Barang nya disua ngagai sida ba sebengkah pengawa ti digulu Menteri Utiliti Sarawak Dato Seri Dr Stephen Rundi Utom, Direktor Pengatur Pengawa enggau Ketuai Pemesai Eksekutif Petronas LNG 9 Sdn Bhd enggau Gerup Serikat LNG Malaysia Mohamed Syazwan Abdullah @ Laga Jenggi enggau Menijar Petronas Carigali Sdn Bhd – Sarawak Gas Mijun Nasin.

“Aku ngarapka pengawa tu ulih ngelempung tating penusah nembiak enggau bala pengajar SK Sebauh sereta meri peransang ngagai nembiak ba pelajar sida,” terang Mohamed Syazwan.

Kelimpah meri bantu ngenyit, Petronas mega nyendiaka sengkabung mua ungkup sekula sekondari ngelingi Bintulu bulan nyin kemari ngambi nagang pengerekai Covid-19 lebuh sekula dibuka baru ila.

MERI PENGELANTANG… Anak Serikat Petronas di Bintulu udah nganjung katil, pua, panggal, selap tilam, sengkabung mua, mesin basu, beg sekula enggau ke bukai ngagai bala nembiak.