KUALA LUMPUR: Opis Menteri Pengerai Malaysia (KKM) merambu ngaga sebuah klinik pengerai ba sitak Data Kakus, Tatau.

Sapit Menteri Pengerai II Datuk Aaron Ago Dagang madah, naka diatu KKM benung ngiga taba ti engkeman endur ngaga klinik nya.

Ku Aaron, Village Health Team (VHT) digulu pemesai perubat ari Klinik Bintulu udah meri servis pengerai nengah servis lutur terebai.

“Enti suba, kami ngena servis lutur terebai tang diatu kami ngena servis VHT laban udah datai jalai.

“Urung 30 pesakit sehari ti datai berubat enggau sida bejalaika servis nya pengelama tiga ngagai empat hari kelimpah dipejalai sekali sebulan,” terang iya.

Aaron mansutka jaku nya lebuh nyaut tanya Kaban Parlimen Hulu Rajang Datuk Wilson Ugak Kumbong di Aum Parlimen, Putrajaya ditu kemari.

Nambahka nya ku iya, bisi 130 iku peranak sehari deka datai ba Klinik Pengerai Sungai Asap.

“Dikena ngemanah servis Klinik Pengerai Sungai Asap, klinik tu udah dikemanah nyadi klinik besai di Pelilih Belaga ba taun 2018.

“Klinik besai tu nyadi palan besai ngagai klinik ba sitak Asap nyengkaum Klinik Sungai Koyan, Klinik Uma Sambop, Klinik Sarawak Hydro, Klinik Tubau kelimpah bekunsika perengkaguna baka makmal, x-ray enggau ke bukai,” ku iya nerang silik.

Iya mega madah, agih belanja penyampau RM700,000 udah diberi dikena meli kereban berubat.

“Sebuah klinik servis ngeli mega udah dikemendar digaga ba Sungai Asap lalu diatu ba renggat dipansik.