SARATOK: Agi tubah projek pemansang pemun patut dipejalai ungkup pengelantang rayat kelebih agi sida ke diau ba menua pesisir.

Sapit Menteri Pengeluar Kuasa enggau Pengeraja Asal, Ali Biju sedarka peranak rumah panjai endang agi randakka pemansang lalu udah nyadi tanggungpengawa iya nangkup peminta sida nya.

Ku iya, agih belanja diberi nengah Projek Mit Pemansang Menua Pesisir (MRP) sebagi ari chara dikena sida ngerumban pengawa ngemansang perengkaguna pemun.

“Aku sedar sereta nemu rayat di menua pesisir enggau menua ulu napi mayuh pemar ketegal empai datai jalai, bedau bisi bekal ai beresi enggau kuasa karan.

“Nya kebuah aku ituk amat nagih belanja ari opis menteri bekaul ba renggat Perintah Besai enggau Perintah Nengeri ngelama tu ngambika projek ulih dipejalai enggau lengkas.

“Tang utai ulih dikereja aku diatu, meri belanja nengah MRP, dikena kita ngaduka sebarang pengawa pemansang ba rumah panjai kita empu sebedau agih belanja ke besai agi diberi,” ku iya.

Jaku Ali nya dikenatai pengari iya, Stanley Tama lebuh nyuaka Chek MRP ngagai Komiti Pemansang enggau Pengelikun Genturung Pendiau (JKKK) Rumah William Dana Tebek, Lubok Renit ditu pagi kemari.

JKKK Rumah William Dana nerima RM20,000 seraya Biro Indu sida diungkupka RM5,000.

Berebak enggau nya, Tuai Rumah William Dana meri besai terima kasih ke penyiru Ali ti seruran ibuhka pengelantang rayat kelebih agi sida rumah.

“Taja diatu kitai jarang meda Ali datai tubuh, enda baka ke suba tang semua nya nadai ngawa laban kitai nemu iya menggi pangku pengawa besai, diberi pengandal nyadi sapit menteri ba renggat Perintah Besai.

“Kami ke nyadi rayat Saratok berasai temegah bisi pengari ba kabinet perintah ke diatu,” ku iya.