KUCHING: Hari Kebangsaan Renggat Nengeri Sarawak 2020 berambaika jaku ‘Malaysia Prihatin’ deka diatur ba pasar Simanggang tauka menua Benak Pangka Pasang.

Tuai Pemegai Menua (TYT) Tun Abdul Taib Mahmud enggau bini iya, Toh Puan Raghad Kurdi Taib disadang datai ngintu Hari Kemerdekaan tu ila.

Kepala Menteri Sarawak, Datuk Patinggi Abang Johari Tun Openg enggau bini iya, Datuk Amar Juma’ani Tun Tuanku Bujang mega disadang datai ba pengerami tu.

Pengerami tu deka diatur kena lemai 30 Ogos enggau ‘Malam Mesra Ambang’ Ngintu Hari Kebangsaan Renggat Nengeri ba sebuah hotel tebilang di Simanggang.

Bemacham main asal deka dipandang raban ari Kaunsil Seni Sarawak enggau peranak Sri Aman empu kelimpah ari TYT enggau Kepala Menteri Sarawak nyuaka surat chiri ngagai ketuai raban bansa.

BAUM… (ari kiba) Datuk Francis Harden, Residen Sri Aman Indit Bangai sereta Sapit Direktor Protokol Negeri enggau Unit Pengatur Pengerami, Hamdan Sharbini rambau aum komiti di Bilik Aum Kaunsil Pelilih Sri Aman, apin lama ke udah.

Mua ke lemai, menteri ti bempu tanggungpengawa bekaul enggau Pengerami tu iya nya Datuk Abdul Karim Rahman Hamzah deka ngenataika jaku pengelalu ngagai bala temuai sebedau ditampung Abang Johari.

Urung 250 iku deka dikangau ngulu pengerami tu kelai nitihka Atur Pengawa Standard (SOP) beduduk ari pandemik Covid-19 ke agi ngerekai.

Tun Abdul Taib Mahmud, Datuk Patinggi Abang Johari enggau bala temuai dipebasa bukai disadang deka ngulu program Unity Walk pagi 31 Ogos bepun ari Palan Sivik Sri Aman kena pukul 9 pagi.

Program bejalai bebala mayuh penyauh 2.5 kilometer (km) nya deka digulu bala penyereta pupu bansa ngerasuk pekayan asal sida lalu bejalai sama mandangka penyerakup pupu bansa di Sarawak.

Sida deka bejalai ngelingi pasar, tebing ai lalu pulai baru ngagai Palan Sivik.

Sebedau program tu berengkah dipejalai, sebengkah video dikumbai ‘Wira’ deka dipandang pengudah Datuk Abdul Karim Rahman Hamzah bejaku.

Nambahka nya, Abang Johari deka bejaku ba mua bala mayuh sebedau Tun Abdul Taib Mahmud ngitau tambai.
Kededua program tu disadang digulu Sapit Kepala Menteri, bala menteri enggau menteri muda sereta ketuai raban bansa.