KUCHING: “Lebuh dunya napi pengerekai pandemik Covid-19, Teknologi Pemadah (IT) nyadi kereban pemadu beguna dalam neruska pengidup, neruska pengawa ngiga belanja sereta ngetanka ekonomi, “ku Datuk Seri Fatimah Abdullah.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit nya madahka pejalai entara menua maya pengerekai Covid-19 maya nya mayuh disekat ti ngujungka pejalai mindah entara pelilih menua enda ulih digaga.

“Nengah bantu IT, mayuh aplikasyen digital, peminta enggau pesan barang mata, peminta barang pemakai enggau belajarka resipi baru nengah online dipejalai enggau luas maya tu.

“Siku indai tunggal ba Dalat ulih ngelakuka murtabak digaga iya nyentukka ngagai menua Bintulu ngena aplikasyen ‘whatsapp’, pia mega siku indai ngagai nembiak nyelai pendiau (OKU) ulih bejual ‘belangga sagu’ iya nengah aplikasyen digital,” ku iya.

Fatimah bejaku munyi nya lebuh ba Pengerami Ngintu Hari Orang Indu Sarawak 2020 di Palan Aum Borneo Kuching (BCCK) seharitu.

Kenu ku iya, nengah Opis Orang Indu enggau Ruang Bilik Sarawak (JWKS), opis menteri iya udah ngena enggau manah pekara digital dalam negapka orang indu di menua tu.

“Kami negapka sida nengah kus , bengkel, latih pengelandik, negapka institusyen ruang bilik, makit enggau dagang nengah online baka WWTC@Online Learning ti ngena aplikasyen ‘zoom’.

“Bagi latih kulinari, spa enggau ngurut serta pemajik gamal bisi 58 latih udah digaga dalam online ti meri pemaik ngagai 1,099 iku penyereta lebuh dipejalai dalam timpuh Atur Tagang Pejalai (PKP) ari 14 Mei ngagai 24 Ogos tu tadi.

“Kelimpah ari nya, dalam negapka instutusyen ruang bilik bisi 187 pasang laki bini enggau 70 iku individu nitihka kus tikah dalam online ti diatur Alpha Malaysia (Sarawak) enggau UWAiS Followership Academy PLT (Borneo).

“Semua tu digaga ngambika orang indu enda tingal dalam dunya digital ti endang nyadi juluk ati Perintah Sarawak dalam ngemansangka ekonomi sereta nambahka penatai pemisi menua datai ngagai taun 2030 ila,” ku iya.