LUBOK ANTU: Surat gerah agih belanja ungkup nyeleti begunan kelas Sekula Primari (SK) Nanga Tibu, Batang Ai ditu deka diperati baru ngambika atur bekaul ulih dipejalai enggau lengkas, ku Jugah Muyang.

Kaban Parlimen Lubok Antu nya madah, surat pasal agih belanja dikena nyeleti begunan sekula nya dikinsil perintah Pakatan Harapan (PH) sebedau tu.

“Diatu piak Opis Menteri Pelajar Malaysia (KPM) besemaya deka beratika baru surat nya.

“Ba hari kepenudi aum Parlimen, ku sempat ngenataika tanya bekaul enggau pekara tu nuju piak Opis Menteri Pelajar Malaysia (KPM).

“Menteri Pelajar II, Datuk Mah Hang Soon lebuh nyaut tanya madah,piak KPM endang setujuka pekara tu (surat gerah) nya diperati baru lalu bejalaika atur ke bekaul enggau lengkas,” ku iya maya dirandau Suara Sarawak bekaul siti penerang sentang penanggul ba SK Ng Tibu ke bisi dibantai ba media rama iya apin lama ke udah.

Dalam penerang sida, KPM madah nya endang udah nyadi tanggungpengawa opis menteri ngenuku ke pengelikun pendiau enggau pengelantang nembiak ba sesebengkah sekula.

Ungkup penerang, SK.Nanga Tibu, Batang Ai bisi urung 90 iku pelajar bemalam ba buding sereta semina ulih dilawa ngena perau kira sejam setengah pejalai ari Jelatung Tekat Batang Ai.

Sekula tu kala bulih agih belanja sepenyampau RM 250,000 ari Perintah Nengeri sereta pengawa ngaga baru begunan ngena agih belanja nya disadang deka berengkah enda lama agi.

JUGAH MUYANG