KUCHING: Perintah Sarawak deka meda baru pangku pengawa Ketuai Raban Bansa enggau Tuai Rumah (KMKK) di nengeri tu bepun taun baru.

Menteri Kaunsil Kandang Menua enggau Pengawa Berumah Datuk Sri Prof Dr Sim Kui Hian madahka bisi sekeda pekara ti bekaul enggau pangku pengawa KMKK ti deka diperatika sida baru.

“Nyin kemari Perintah Sarawak udah ngemendarka 1,064 pangku pengawa nyadi KMKK di rumah panjai.

“Diatu, pengudah meri perati ngagai pelilih menua pesisir, kitai mega deka meri perati ngagai pelilih di mengeri ngambika nadai pansut isu enda chukup KMKK di sesebengkah genturung pendiau,” ku iya.

Iya madah munyi nya lebuh datai ngulu Pengawa Nyuaka Setipikit Basa enggau Setipikit KMKK baru ba Opis Residen Bagi Menua Kuching ditu, kemari.

Ku iya, proses meda baru pangku pengawa KMKK tu begunaka awak dikena sida ngelala sapa ti patut dichiri kelebih agi ba genturung pendiau.

“Taun baru, kitai deka ngambi awak berandau sebedau mutuska pangku pengawa tiap iku KMKK di Sarawak.
“Enggau nya ila, aku ngarapka nadai agi isu enda chukup KMKK ba mengeri baka Kuching enggau ke bukai,” ku iya.

Berebak enggau nya, Kui Hian mega madah, pangku pengawa nyadi KMKK ba jeman diatu entara pekara ti pemadu beguna dalam ngemajuka Sarawak.

“Sida mesti meri servis ngagai mensia mayuh kelimpah ngaga kaul ti manah enggau komuniti.

“Nangkan nya, mayuh projek pemansang enggau program deka digaga perintah udah tu ti begunaka kerejasama ari rayat.

“Nya kebuah, KMKK ngempu tanggungpengawa mantu perintah ngambika juluk ati ngemajuka Sarawak ulih dijapai,” ku iya.

Kenu ku iya, projek pemansang baka bekal ai beresi, jalai alun enggau kuasa karan benung digaga Perintah Sarawak lalu deka tembu ba taun 2025.

“Nya alai, kerejasama ari semua piak endang amat beguna ngambika semua pekara tu ulih nyadi enggau manah,” ku iya.

Kemari, John Tiong Fat Chong dichiri nyadi Pemancha Mengeri Kuching pengudah pengawa nya puang kenyau Januari tu tadi.

Kelimpah John, empat iku sida ke bukai bisi dichiri kemari iya nya Penghulu Phang Jee Kin, Kapitan Chai Ming Chin, Kapitan Chew Joon Fah enggau Kapitan Tan Gun Kee.

Ungkup rikod, KMKK di selampur Sarawak bisi 357 iku nyengkaum temenggong, pemancha, ketuai raban bansa, kapitan enggau tuai rumah.

Sama bisi datai Residen Bagi Menua Kuching Sherrina Hussaini, Pemesai Pelilih Menua Kuching Awang Yusup Awang Mostapha enggau ke bukai.