KUCHING: Pengawa mantu raban seranta ngulihka pelajar ti menyana nyadi pekara lumur satu deka digaga Pemancha John Tiong Fat Chong.

Iya ti dichiri nyadi Pemancha Mengeri Kuching bepun 1 September tu ila madahka pengawa nyiri iya nya siti tanda basa ti beguna.

“Terima kasih ngagai Perintah Sarawak laban udah pechayaka aku mangku tanggung pengawa tu.

“Mantu raban seranta ngulihka pelajar ti meruan nyadi pekara pemadu tumu deka digaga aku,” ku iya lebuh ditanya pemberita ba Pengawa Nyuaka Setipikit Basa enggau Setipikit KMKK di Opis Residen Bagi Menua Kuching ditu, kemari.

John madah, iya deka mantu komuniti seranta ngulihka perengka pemun dikena ngulihka pelajar ti manah.

Pemancha Mengeri Kuching John Tiong Fat Chong.

“Pelajar siti pekara ti pemadu beguna laban aku pechaya nengah pelajar tikas penyeranta di menua tu ulih dipunaska.

“Ari pangku pengawa tu, aku ulih nyadi jematan entara komuniti enggau perintah nengeri mutarka isu bekaul ti dalam bidang kuasa aku empu,” ku iya.

Iya mega madahka diri enda berat tulang mantu komuniti ba luar Kuching enti nyema bisi peminta.

Kelimpah ari nya, Kapitan Chai Ming Chin ti dichiri nyaga genturung Tabuan Height enggau Batu Lintang madahka iya deka ngemanahka servis ngagai komuniti ba dua buah genturung nya.

“Aku agi baru enggau begunaka sukung ari orang bukai baka penghulu enggau kapitan ke bukai.

“Nya alai, aku deka ngaga pengabis manah ngagai komuniti di Tabuan Height enggau Batu Lintang ngambika genturung tu likun enggau selamat.

“Aku ngarapka komuniti di genturung nya mega meri kerejasama,” ku iya.

Kapitan Chai Ming Chin.