SEBAUH: Peranak ba Pelilih Sebauh deka nerima sistem bekal ai ke menyana agi pengudah Projek Rayat Bekal Ai ba pelilih nya tembu taun 2022.

Inisiatif Perintah Sarawak ti udah berengkah dipejalai ba taun 2019 nengah Opis Menteri Utiliti Sarawak enggau Opis Bekal Ai Menua Pesisir (JBALB) ngagai peranak ba Sebauh, Ulu Sebungan, Pandan enggau kandang menua sepanjai Jalai Bintulu- Miri bepun ari Batu 18 ½ ngagau Kaunsil Getah Malaysia.

Menteri Utiliti, Datuk Sri Dr Stephen Rundi Utom madah, Perintah Sarawak udah ngemendar lapan Projek Rayat Bekal Ai ngena agih belanja RM200 juta nentuka peranak ba pelilih Sebauh ulih nerima bekal ai beresi ke meruan agi.

Ku iya, projek tu ngaul pengawa nukar paip lama, masang paip barum ngaga stesyen pam ai enggau ngaga tangki ai.
“Naka tu, empat projek udah tembu seraya dua agi projek benung dipejalai enggau disadang tembu ba suku keterubah taun 2021,” ku Rundi.

Rundi mansutka jaku nya lebuh bejadika Projek Bekal Ai Menua Pesisir Pelilih Sebauh di Rumah Muli Uching, Ulu Sebungan, Sebauh, ditu kemari

Rundi ti mega Adun Kemena madah, diatu siti agi projek agi ba renggat ditinda bulan Oktober tu enggau disadang tembu taun 2022 seraya siti agi projek deka diberi bulan Oktober tu.

Ba Ulu Sebangan, projek ngaga stesyen pam ai enggau tangki ai tinggi beungkus RM10 juta benung dipejalai lalu disadang tembu pun bulan Januari 2021.

Rundi madah, naka diatu projek nya udah tembu 60.59 peratus lalu deka meri pangka besai ngagai 3,500 peranak

ba Ulu Sebungan enggau Pandan laban udah nerima bekal ai beresi ke meruan agi pengudah projek tu tembu ila.

Kelimpah ari nya ku iya, piak opis menteri enggau JBALB seruran bekerejasama rat nentuka penanggul bekal ai deka diputar enggau manah.