SARATOK: Pengawa beripai semampai dikemeran peranak rumah panjai kenyau ari kelia.

Tuai Rumah Beliang Beti ari Sungai Raba di Budu, Krian ditu madah, pengawa beripai diatur dua bulan sekali nya mai mayuh pemaik ngagai sida serumah.

Kelimpah ari kandang ngelingi rumah panjai beresi ku iya, nengah pengawa beripai mega ulih negutka agi tanggam kaul sida serumah ke bisi 20 pintu bilik pemanjai.

“Kami ngena awak beripai tu besaup ngereja pengawa ke berat, betulung nanggung utai ke lempung lalu nadai belampung tulang enggau pangan diri lebuh gawa.

“Nambahka nya, tu mih awak kami ulih begempuru ngatur pengawa, sida ke gawa ba mengeri bisi pulai seraya ngabas bilik penaik enggau orang tuai ke diau ba menua,” ku iya.

NGEMPUNG RAYAT… Tuai Rumah Beliang Beti

Nitihka atur ku iya, abis nadai siku sepintu nurun lebuh pengawa beripai nya diatur, tang enti mayuh tubuh deka nurun gawa nya ke manah agi.

Serak tu, sida serumah udah bebagi tubuh ngereja pengawa ke alai sida ke lelaki nebas rumput, ke indu ngumpul uras enggau nunu uras ke udah ditugung, bala nembiak ngupas parit ngambika enda alit.

“Sekeda sida ke regas enggau sikar bejalai dalam babas diasuh ngupas batang paip ai bukit nangika bisi bumbus tauka alit laban reba enggau rau dibai arus sungai.

“Bala bukai ti udah diberi tanggungpengawa ba pest control tauka pengawa manchit nyamuk, indu kerengit, ular, nyemayar enggau kala tauka jelu bisa ke bukai sebelah babas ti tau niki ke rumah lalu nganu nyawa.

“Kereban dikena ba pengawa pest control tu diberi Opis Pengerai ungkup pengelikun enggau pengelantang kami serumah,” ku Tuai Rumah Beliang lebuh dirandau ba program beripai pagi tadi.