Tusun kepenudi

MAI kitai ngelansa silik agi kenang siku Graduet bidang Sains Sosial ari Universiti Malaysia Sabah (UMS), Nicholas J. Ugik senentang chara dikena ngangkatka jaku Iban.

Ba kenang dulu ari tu, kitai udah dibai Nicholas ngenang pasal Iban kemaya hari enggau Jaku Iban angkat ari nguasa dagang ti mai runding kitai jauh ke mua.

Ari semua leka jaku ke udah dipeririska iya, kitai bala mayuh sama beratika bakani chara kena ngangkatka jaku Iban ngambika seikas enggau jaku bukai ti dulu nyulut sereta dikelala, jaku ekonomi ku rebak kemaya hari.

Beratika utai ke patut endar nyadi buah runding kitai iya nya bakani ka ngenanka jaku Iban ba jeman diatu ti deka dikenang Nicholas enggau kitai serak tu.

BUAI RUNDING KEPAPAS

PESAKA… Sekeda duit keretas dikeluar jeman pegai Rajah Brooke munya.

Munyi ku kupas iya ke dulu tadi, nguasa pengawa dagang (ekonomi) kelimpah ari pelajar sekula enggau aum besai jaku Iban endang jalai ke patut enggau pemadu engkeman dikena ngangkatka jaku bansa kitai tu.

Ka mujur dalam pengawa dagang kitai ulih ngena chara supply chain iya nya nitihka rintai pekara pemadu beguna dikena ngemajuka diri.

Ku iya, nentuka supply chain tu ulih dikena enggau mujur, kitai Iban patut muai antu kepapas, antu benchi, antu bechiping entara diri sama diri.

Dikena ngorangka penyakit kepapas tu, bala Iban ke udah dulu angkat tinggi anang tak ngira diri, anang sumbung, anang makai bansa diri enggau anang nipu bansa diri.

Tang utai ke patut digaga iya nya betulungka sapa Iban ke agi merinsa, sapa Iban ke agi tusah enda nemu mutarka jalai pengidup.

Saup sapa Iban ti agi seranta ketegal tekul laban belanja enggau sapa anak Iban pemegai sijil, diploma, degree, master enggau PhD, ke agi kapa-kapa ngiga pengawa.

Iya madah, bala menteri kitai Iban mayuh, bala pengari rayat kitai Iban pemadu mayuh ba Kunsil Nengeri Sarawak enggau pemegai dagang besai bansa Iban engka bisi bebelas iku di Sarawak.

Kini ke penunga menteri, pengari rayat enggau orang dagang (bisnes) tu deh?

UBAH PENDIAU

MALIN… Sekeda ari bup dikeluarka Tun Jugah Foundation.

Peranak bansa kitai patut diangkat sama ngambika ngeringka bansa Iban baru jaku Iban ulih mansang.

Lalu pia mega peranak Iban enti ka sama mansang bediri tinggi enggau orang patut nemu ngibun pendiau pengidup diri.

Tulang anang berat enggau anang leju bejalaika pengawa baikka pengawa di tanah tauka di sebarang endur.

Baka nya mega penyakit selalu mabuk nya patut dibuai laban arak nya rachun ke munuh pendiau bansa kitai enda berasai.

Gerempung Dagang Dayak di Kuching patut lebih bebendar agi bejalaika atur pengawa dagang enggau mantu sapa bala anak Dayak ke bisi ati besemekih dalam pengawa tu.

Anang nyadi gerempung bisi dipeda atas keretas aja tang nadai ulih merambu enggau bejalaika pengawa dikena ngangkatka bansa diri.

Bepelasarka pansik, jaku asal bansa nyadi akar dikena neguhka penuduk bansa kelimpah nyadi kelai (identiti) bansa sida.

Nya alai, nadai kebuah jaku Iban ke nyadi jaku asal enggau gaya iduo kitai diteju pia aja kelebih agi maya nyapai penyulut ba pelajar tauka dagang.

JAKU DAGANG

ANGKUN… Nicholas begambar ungkup kenang enggau Pemesai Pemansik Tun Jugah Foundation, ex-Pengajar Philip Igai.

Nguasa pengawa dagang dikena ngangkatka jaku Iban jalai ke engkeman laban bansa bukai ke deka merambu pengawa dagang.

Ari nya, bansa bukai deka belajarka jaku kitai enti sida meda dagang bansa Iban tu mujur, ulih besemekih baka sida.

Nicholas empu udah bechuanka bansa China di Malaysia ba genteran kenang dulu ari tu.

Apin iya bejuraika bansa Jipun enggau bansa Perancis, sida endang ngangkunka jaku bansa diri empu lebuh bejalaika pengawa dagang enggau menua luar.

Orang menua luar ke deka nempa kaul dagang tauka ke bukai enggau bansa China endang belajar ke jaku sida.

Ari nya tadi, jaku sida tu ulih ngerembai lalu dipansik ba universiti tauka palan pelajar tinggi ngambika dipelajar bagi sapa ke deka nemu jaku sida tu.

Nya alai ba penemu Nicholas, kitai Iban kelebih agi patut ngubah pendiau pengidup nuju tikas ke manah agi.

Ku iya, nya baru jalai pengidup enggau jaku kitai Iban deka dipeda enggau chukup basa ari tinjau bansa bukai.

Nicholas empu besai amat pengarap ngagai jaku Iban tu agi ulih bediri tegap lalu enda lesi ditujah penguji.

SIMPUL KENANG

Pengawa ngerembaika jaku Iban ari nguasa dagang nunda raban bansa China endang patut dipegai genap iku kitai.

Penaluk enggau pengangkun ke bansa diri empu bepun ari ulah kitai ngubah runding enggau peragam enda manah orang bukai ngagai bansa kitai empu.

Kitai udah meda, dunya dagang bebasaka pemintar enggau pengelandik bansa China ngemansangka menua sida, daya idup nyengkaum mujur ngerembaika jaku.

Ari nya, kitai patut belajar enggau meretika pangku pengawa diri ba pemansang enggau ngetanka jaku Iban, abis nadai meransang rebak baru nemu jaku tu.

Ukai reti ngelaung jaku bukai ti udah dulu nyadi jaku ekonomi enggau batang jaku ba sekula, tang kitai dekaka jaku Iban tu bela diberi perati nitihka pematut.

Nicholas nyemetak madahka diri nyukung tegut pengawa dipejalaika bala pemansik jaku Iban nyengkaum sida ari Tun Jugah Faundation.

Iya madah, rebak baru patut mega dibatak enggau diembing ba pengawa baka tu ngambika bisi nampung pengawa sida ke tuai ungkup rebak dudi.