MIRI: Sepenyampau 210,240 entukar import ari Brunei Darusalam udah rejister ba Sistem Pematau Entukar (VMS) kenyau ari sistem tu dipejalai kena 1 Ogos taun nyin kemari nyentuka 25 Ogos tu tadi.

Penguasa Kastam Pampang ICQS Sungai Tujuh, Doehailee Bujid madah, ari penyampau entukar nya, bisi 188,692 iku peminta dirikodka ba VMS laban bisi peminta ke ngembuan lebih ari sebuah entukar.

“Pengawa matau entukar import deka diatur enggau manah ngena sistem tu.

“Pia mega, pekara tu mega ulih nyeliah sebarang penusah lalu meri servis pemadu manah ngagai mensia mayuh setipak enggau visyen Opis Kastam DiRaja Malaysia (JKDM) iya nya ‘Kastam Peneraju Kemakmuran Negara’,” terang iya.

Doehailee mansutka jaku nya ba aum pemberita rambau Program Dokumentasyen VMS di ICQS Sungai Tujuh, ditu ensanus.

Iya mega madah, nadai sebarang sebana bekaul jalai sekut diterima baka sebedau tu kenyau ari VMS dipejalai ba pos pematau.

Lebuh ditanya pasal kes salah guna VMS, Doehailee madah, bisi 46 buah entukar ditemu ngereja salah.

“Bisi 46 buah entukar nya tebal agi bekaul entukar import diau ditu lebih ari timpuh tiga bulan baka ti udah ditaga,” terang iya.

Nambahka nya, iya madah nya aja entukar ti ngereja penyalah ba taun tu aja kenyau ari bulan Januari.

VMS dipejalai ngena pas scanner digital ba Pos Pematau Adan Menua Imigresyen, Kastam enggau Kuarantin (ICQS) Sungai Tujuh ungkup semua entukar import ari Brunei Darusalam ti tama kitu.

Sama datai Penulung Kanan Direktor Kastam II Pampang Perkastaman, Adriana Mohamad Saaid, Penguasa Kastam Pampang Penerit Adat Rusdi Wahab enggau Penulung Penguasa Kastam Kanan ICQS Sungai Tujuh, Suriati Ahmad Shokri.

Nengah sistem VMS tu, peminta ulih minta dikelaung ari mayar chukai di baruh ‘Butiran 13 Perintah Duti Kastam (Pengecualian) 2017 ‘nengah online (pas entukar) iya nya ba website www.customssg7.my.

Sida ulih nganjung peminta dulu sebedau tama ke Malaysia.

Genap entukar import ti tama ke Malaysia kelebih agi ngagai Sarawak mesti scan enggau minta pemendar dulu ari pemesai kastam ti gawa sebedau dikemendar tama ke Malaysia ke alai pemendar semina diberi ba timpuh tiga bulan.