KUCHING: Bisi siti kes baru positif Covid-19 nambah di Sarawak nyadi ba Pelilih Kuching, lalu ngujungka penyampau kes naka seharitu bisi 698 kes.

Komiti Penyangga Penusah Ngenyit Nengeri Sarawak (JPBNS) madah kes ke-698 tu mungkur siku indu peranak menua tu empu, berumur 48 taun.

“Kes ditemu pengudah ngaga swab rT-PCR Covid-19 kena 28 Ogos laban ti deka beperesa ungkup pengawa bebuntas.

“Pemutus peresa ari makmal nunjukka swab nasopharyngeal enggau oropharyngeal kes kena positif Covid-19 kena 29 Ogos.

“Kes bisi mandangka kelai sakit kena 14 Ogos tu tadi,” ku penerang.

Nya alai, pengawa nyidi orang ke bisi kaul enggau kes benung dipejalai.

Udah nya, kes dipasuk ngagai Sepital Besai Sarawak (HUS) kemari 29 Ogos enggau kes dikategori kes nyadi dalam menua.

Berebak enggau nya, siti kes Kluster Alam mengkang ngerekai sereta ngerikod tujuh iti kes.

“Pia mega nadai kes baru dirikodka gerai enggau dikemendarka pansut ari sepital .

“Naka tu penyampau semua kes positif Covid-19 ti udah dikemendarka pansut ari sepital mengkang 662 tauka 94.84 peratus,” ku tandu penerang nya.