KUCHING: Guna ‘Augmented Virtual Technology’ (AVT) dalam sektor dagang temuai entara chara dikena perintah mansang ke mua ngelakuka sektor dagang temuai di menua tu.

Kepala Menteri Datuk Patinggi Abang Johari Tun Openg madahka sektor dagang temuai nengah AVT ulih narit mayuh agi bala temuai rindu deka nemuai ke Sarawak.

“AVT nya utai ti dipeda baka ti amai nyadi (ba dunya nyata). Ambika chunto enti deka meda Taman Negara Bako kitai ulih meda pemanah rampa menua baka ti rembus ba palan nya,” ku iya.

Abang Johari bejaku munyi nya lebuh bejadika Pengerami Ngintu Hari Orang Indu Sarawak 2020 di Palan Aum Borneo Kuching (BCCK) ditu, kemari.

Tandu iya, AVT mega manah dikena ngelakuka produk pemakai di menua.

NYADIKA PERANSANG…Kepala Menteri Datuk Patinggi Abang Johari Tun Openg nyuaka ‘Anugerah Ketua Menteri Penggiat Sosial Wanita’ ngagai Mary Tay Siew Geok (kanan) seraya dikemataka Datuk Seri Fatimah Abdullah (kiba). Gambar RAMIDI SUBARI.

“Asil produk pemakai kitai mega ulih dijual ngena teknologi. Pekara tu deka mantu orang dagang indu awakka sida ulih nambahka penatai pemisi enggau lebih meruan,” ku iya.

Kenu ku iya, dikena negapka sektor ekonomi di menua tu bisi empat pekara deka dikemansangka perintah nengeri.

“Empat pekara iya nya sektor betanam betupi moden, sektor dagang temuai nengah AVT, kreativiti fesyen enggau pekara pelajar.

“Betanam betupi chara moden baka sistem fertigasyen ulih nambahka penatai pemisi orang indu ti rinduka pengawa betanam betupi.

“Ba menua pesisir kitai deka nyeridi rayat ngena teknologi tu (AVT) ba pengawa betanam betupi moden,” ku iya.

Kelimpah ari nya, iya madahka pengelandik sereta kreativiti orang indu dalam pekara fesyen mega amat manah.

“Sekeda sida bejualka labung pala (tudung) bemacham gaya nyentukka bisi aplikasyen bejual labung pala.

“Nya alai, nyema deka bejual perengka fesyen ti meruan kitai patut nitihka trend kemaya hari. Bisi produk fesyen ari Sarawak udah rembus ngagai menua Amerika Syarikat baka pua kumbu,” ku iya.

Pengerami Ngintu Hari Orang Indu Sarawak 2020 kemari diintu ngena chara baru iya nya digaga live ngagai 40 Opis Orang Indu enggau Ruang Bilik (JWKS) Pelilih Menua di selampur Sarawak.

Berambaika jaku ‘Sarawak Woman in Digital Era’ pengerami nya diintu laban ngaku pemesai pengku pengawa orang indu dalam dunya digital lebuh deka nyikap diri ngagai ‘Industrial Revolution 4.0’.

Sama bisi datai temuai khas bini Tuai Pemegai Menua Toh Puan Datuk Patinggi Raghad Kurdi Taib, bini Kepala Menteri Datuk Amar Juma’ani Tun Tuanku Bujang, Menteri Dagang Temuai, Seni enggau Main Asal Datuk Seri Nancy Shukri, Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Sekretari Perintah Nengeri Datuk Jaul Samion enggau bala bukai.