Industri Muzik Iban sebaka enggau industri muzik bansa bukai enda ulih nyeliahka diri ari kena keruga sekeda peminat lagu ti enda beradat.

Ambika chunto, industri muzik Iban mega betapi enggau bemacham penanggul nyengkaum pengerugi ketegal ulah ‘lanun chelak tiru’ ti ngujungka VCD lagu Iban ke tulen nyau enda laku.

Ulah dikereja bala lanun chelak tu mih ngujungka bala penanyi enggau kompeni rikoding balat asa laban ti nadai nyengala bulih ulih untung ke dikeandal ati.

Kedua nyangka nya bisi untung mimit tauka disempama semina baka ‘buntak pulai buntak’ iya ungkup pulai puku aja.

Nya lansa pendiau pengerugi, pemedis ditapi ba dunya pemerindang kemaya hari tu beduduk ari karya sida ke dirumpak belalai.

ALBUM GAWAI 2020…Entara bala kaban penanyi ti nyereta Embat Lala (duduk kiba) nempa album lagu Gawai 2020 tu tadi.

PANGGAU BULUH PENGERINDU

Siku penanyi Iban tebilang Embat Lala ke mega pemenggi serikat rikoding Panggau Buluh Pengerindu (PBP) ke bepalan di Miri madah sida mega bisi kena pechik bias pengerugi ketegal mayuh lagu enggau album penanyi dibaruh serikat iya pan bisi kena chelak tiru orang bukai.

“Nya alai, diatu kami agi ngetuka dulu pengawa nyual VCD ungkup artis PBP kenyau tiga taun ke udah iya nya ari 2018 nyentuk diatu (2020).

“Sekumbang dalam timpuh nya semua lagu ‘single’ penanyi baruh perabung Panggau Buluh Pengerindu (PBP) semina dikeluarka nengah Channel Youtube Serikat PBP. Kami entara serikat rikoding ti pemadu tumu ba Sarawak mungkal pengawa ‘upload’ lagu Iban ba media rama baka Youtube.

“Nya alai diatu mayuh serikat rikoding nyau nadai agi nyual VCD ba kedai lalu semina ngayanka lagu ba Youtube sereta bepanggai ba bayar ‘royalti’ ari Youtube nyadika penatai pemisi serikat.

Disema enggau jaku udah labuh ditinggang ga enggau lesung, munyinya mih sempama engkeman ngenang pejalai industri muzik Iban diatu.

EMBAT LALA

PENANGGUL BARU

Diatu kitai bela nemu bala penanyi enggau serikat betapi enggau siti agi penanggul ke baru.

Penanggul ke baru tu enti enda diputar enggau lengkas tau bendar ngasuh serikat rikoding sereta penanyi lagu Iban

‘Ngiling tikai’ laban semina gawa tang nadai teulihka asil iya nya nadai ‘gaji’ dianti ari lagu tauka album ti ditengkebang sida.

“Ambika chunto, baka peminat ti ngambi (download) lagu ba Channel Youtube, udah nya lagu tu tadi di ‘reupload’ sida baru nengah channel sida empu enggau chara nadai pemendar ari penanyi enggau serikat ke nempa lagu nya.”

“Pengawa baka tu tau dikumbai ngerumpak maya siang hari laban nyengenda sereta sengaja deka bulih untung ari asil pengawa orang bukai.

“Sida ke ngereja pengawa baka tu endang nadai berunding sinu ngagai bala artis ti udah bekenanas muai jam, muai hari nembuka pengawa besengkang mata endur nembuka lagu ungkup album diri.

“Ulah sekeda peminat ti enda mereti iya nya semina ngira penguntung diri baka tu balat meri pangka ti enda manah ngagai semua orang ti bisi kaul enggau siti-siti lagu nya baka penengkebang leka sereta tiun lagu kelimpah ari serikat ke endang ngempu hak ngeluarka VCD.

“Diatu mayuh peminat rindu ngambi lagu ari channel Youtube serikat nengah chara ‘download’ sebedau ‘reupload’ baru ba channel sida empu nyengkaum ba aplikasyen media rama bukai baka Facebook, Whatsapp, Instagram enggau ke bukai enggau nadai pemendar.

“Kebendar pengawa baka tu enda betul sereta salah ba undang-undang, enti didawa sereta dikenuku salah tau bendar pulaika pemedis laban enchuri karya tauka hak orang bukai enggau nadai pemendar.

“Ari ulah ti baka nya tadi penyampau orang ti ngelawa tauka ‘view’ channel Youtube serikat nyau mimit, pia mega penyampau bayar ‘royalti’ ari piak Youtube pan kurang.

“Penanggul tu, enti enda dipejah tumu tau bendar meri pengerugi besai ngagai semua orang enda milih sapa asal iya bisi kaul enggau dunya pemerindang,”ku iya maya dirandau Suara Sarawak.

Berebak enggau nya, Embat udah mupuk nerang ngagai mensia mayuh nengah media rama awakka ngetuka ulah ngambika karya orang bukai.

Ulah nya baka nya tau disema enggau jaku tuai Iban baka ‘Lelabi ke bekuli tekura ke terima’.

“Diatu, aku udah numbuhka siti gerup volunteer awakka besaup meri tangkan nuju mensia mayuh awakka enda sengapa ‘download’ sereta ‘re-upload’ lagu ari serikat PBP.

“Baka selama nyema bisi orang ditemu kami ‘download’ lagu ari PBP enggau nadai pemendar, iya dipinta madamka video lagu nya sebedau neruska atur bukai nyema enda ulih rara.

ARAP NYADIKA TELADAN

“Apin lama, piak PBP bisi ngeripot siku penguna media rama ngena nama Camelia. Indu tu ditemu kami bisi reupload siti lagu dikumbai Dunya Aku Empu ari penanyi Olivia C.

“Ba kes nya, iya (Camelia) udah ngaku diri salah sereta setuju mayar ukum RM 5000 ungkup siti lagu ke di re-upload nya.

“Ukai tuju deka ngemalu sereta ngayah sesapa, tang besai pengarap aku nuju sida ba luar dedin nguna kes ‘Camelia’ tu nyadika teladan lebih agi bekaul enggau Akta 332 Akta Hakcipta 1987,” ku iya.

Naka tu sekeda artis PBP ke bisi lagu baru dipasuk dalam Channel Youtube baka single ari Hailey (Enti Enda Sayau) teulihka 542 view, Dunya Aku Empu (Olivia C) 1.2 juta view, Aku Ketawa Ati Merinsa enggau Aku Rindu Nuan Benchi (Alexander Julius), Asa Ketegal Pengerindu (Alfred Liang), Lebuh Tuhan Nganggau Nuan enggau Corona Virus (Phoebe Chloe).

“Tu lalu ditangkan ke lagu Pengerindu Tua,Idup Merinsa,Nadai Kerja,Nuan Dipilih Aku,Rina,Juluk Ati Enda Datai,Sayauka Nuan Aja,Nuan Bintang Ati Ku,Nuan Dara Begaya enggau Tepagang ari penanyi Hasby Bee enggau mayuh agi ke bukai,” ku iya.

Nangkan nya, Embat madah PBP bisi ngeluarka 4 iti lagu Gawai ungkup taun 2020 asil kerejasama enggau Serikat Rikoding Jamison Music Production (JMP) ke diempu Joseph Clem.

“Empat iti lagu iya nya ‘Anang Nyabak Enda Pulai Gawai’ ke mega siti lagu duet Embat Lala empu bebala mayuh begulai enggau Joseph Clem, Karlos enggau Tores.

“Udah nya,lagu Gayu Babi Nadai Gawai ari sada nyawa penanyi Christina B begulai enggau Phoebe Chloe lalu ke penudi dua iti lagu ari Azrafill,Jenal enggau Jack dikumbai Gawai Taun 2020 enggau Anang Masang Lagu Gawai,”ku iya.

PERAMBU PBP

Diatu PBP, ku iya benung merambu deka ngeluarka VCD album solo Walter Intau ti ngundan semilan buah lagu.

Udah Hailey mega deka datai enggau lagu single diberi nama Pengerindu Balang ditangkan siku penanyi baru iya nya Billy enggau lagu asil tengkebang Monica Elen dikumbai ‘Beribu-ribu’.

“Aku ngarapka taun tu PBP ulih ngeluarka mayuh agi lagu baru lalu meri terima kasih ke sukung bala peminat lagu Iban lalu pemadu beguna iya nya beri mih sukung ngagai bala artis kitai Iban nengah chara ti engkeman.

“Terima mega ngagai Suara Sarawak laban udah meri awak enggau peluang alai aku ngenatai ke sekeda pekara ti nyadi ba dunya pemerindang jam ke diatu,”ku iya