KUCHING: Komiti Sekretari Nengeri deka meresa baru nama sida indu bedagang ke bedau bulih bantu ari perintah beduduk ari pangka maya pengerekai Covid-19 di menua tu.

Kepala Menteri Datuk Patinggi Abang Johari Tun Openg madahka kebuah orang indu ti bedagang nadai bulih bantu ari perintah iya nya laban sida nadai ngembuan permit tauka lisin ari Kaunsil Kandang Menua (PBT).

“Kenyau taun 2018 kitai mantu orang indu ti dagang nengah pengawa ngadaka perengka dikena sida bedagang.

“Ketegal Covid-19, Datuk Seri Fatimah (Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit) minta bantu nya ditukar ngagai mata duit lalu aku mega udah setuju, tang penanggul ti ditapi sida iya nya nadai berejister ba PBT,” ku iya.

Abang Johari bejaku munyi nya lebuh ditanya pemberita pengudah bejadika Pengerami Ngintu Hari Orang Indu Sarawak 2020 di Palan Aum Borneo Kuching (BCCK) ditu, kemari.

Tandu iya, penanggul nadai berejister ba PBT tu ngasuh orang dagang indu nadai permit tauka liain taja sida bisi ngaga asil produk ari rumah.

“Diatu, Fatimah minta nama sida ti nadai lisin tu dipasukka dalam bantu Geran Usahawan JWKS ke ngerejister ba baruh sida.

“Pekara tu ti benung diperati aku, kitai mesti meresa dulu sapa ti endang patut diberi bantu,” ku iya.

Ku iya, sida ti deka dibantu tu endang orang dagang indu ti nadai bulih bantu ari Bantuan Khas Sarawakku Sayang (BKSS) enggau Bantuan Prihatin.

Dulu ari nya, Fatimah dalam jaku iya beserimbai enggau Ngintu Hari Orang Indu Sarawak 2020 madahka Geran Usahawan JWKS ke beungkus RM2 juta ungkup taun 2020 deka ditukar nyadi mata duit penyampau RM2,000 siku.

“Bantu nya deka meri pemaik ngagai urung 1,000 iku orang dagang indu di menua tu ti kena pangka Covid-19.

“Taja pia, naka 30 Julai, opis menteri aku udah nerima penyampau 10,921 peminta ngagai geran nya.

“Penyampau peminta tu amat mayuh, nya alai aku minta Kepala Menteri nambah agih belanja ngagai geran tu ngambika mayuh agi orang dagang indu ulih dibantu,” ku iya.