SIBU: Siku lelaki beumur 25 taun rugi RM27,000 pengudah kena tipu nengah sebengkah saham ti bula, kemari.

Ketuai Polis Pelilih Sibu ACP Stanley Jonathan Ringgit nengah sebengkah penerang iya kemari madah, sebedau tu lelaki ke gawa nyadi juruaudit nya ngerijister diri enggau siti saham online ba rumah iya empu di Jalai Lilin ditu ngena siti aplikasi ari menua luar.

Ku iya, lelaki nya ngelala aplikasyen enggau saham nya ari siku indu ke benama ‘Chen Xiao Xiao’ dikelala nengah aplikasyen LINE.

“Tudah ke tepaut ati enggau saham nya terus milih pakej saham normal VIP ti besemaya meri untung 10 peratus ari genap puku saham ke dibeli.

“Nya alai, iya nadai kakang terus meli saham RM27,200 lalu dibayar ngagai empat akaun bank ke diberi saspek dalam lapan transaksyen,” ku iya.

Stanley madah, tudah lelaki nya bepun mindahka duit chara online kena 19 Ogos tu tadi urung pukul 10.26 malam penyampau RM100 ngagai sebuah akaun diberi nama ‘Ang Peng Loong’.

Hari siti kena 20 Ogos, iya madah, lelaki nya mindahka baru duit ngena chara online,  penyampau RM2,000 ngagai akaun ke dipenggi ‘Chan Wern Xin’ lalu bulih untung RM200.

“Udah nya 21 Ogos urung pukul 4.46 lemai iya mindahka baru duit chara online penyampau RM2,200 ngagai akaun ke dipenggi ‘Hng Chi Yong’.

“Udah nya kena 23 Ogos, urung pukul 12.18 tengahari iya mindahka duit chara online penyampau RM2,400 ngagai akaun ‘Ahmad Faizal Bin Ismail’.

“Dua hari udah nya kena 25 Ogos, tudah lelaki tu nepu baru duit RM4,000 ngagai akaun ‘Chan Wern Xin’ urung pukul 12.51 tengahari,” ku iya.

Udah nya, ku Stanley kena 26 Ogos lelaki nya bisi dua kali mindahka duit chara online ngagai akaun ‘Won Choon Heng’ penyampau RM8,000 enggau akaun ‘Won Lee Chin’ penyampau RM8,500.

“Pengudah iya nemu diri kena tipu laban ke nadai nerima sebarang untung baka ke udah disemaya iya terus datai ngaga ripot polis.

“Kes dipansik nitihka Seksyen 420 Kanun Keseksaan laban penyalah nipu,” ku iya.