SIMANGGANG: Serakup Projek Pensel udah mantu dua nembiak ti deka nampung pelajar ngagai palan pelajar tinggi perintah taun tu.

Presiden iya, Norina Umoi Utot madah, bantu nya diberi nyadika peransang enggau dikena nyaup ngelempungka tating belanja sida sebilik.

Ku Norina, iya sedarka pemesai belanja dikena lebuh terubah rejister belajar ba tikas pelajar tinggi laban nyau deka semua utai bepungkal baru.

“Aku meretika tating belanja ditapi sida tu sebilik lebuh nganjung anak belajar kelebih agi enti jauh di Semenanjung.

“Nambahka nya, aku deka meri peransang ngagai seduai tu ngambika ransing agi belajar ngiri penemu enggau enda mudah mantul ngapa lalu ingatka penusah enggau pengiruh apai indai ngiga belanja nyekulaka sida,” ku iya.

NYADIKA PERANSANG… Norina (tengah) diapit Effa (kiba) enggau Yap begambar ungkup kenang pengudah pengawa nyuaka insentif, kemari.

Norina mansutka jaku nya lebuh dirandau Suara Sarawak ba pengawa nyuaka Insentif Pelajar RM1000 siku ngagai Effa Nur Sharmilla Yazid enggau Yap Siao Tong, ditu kemari.

Iya madah, pekara pelajar enda tau enda dikemerat laban nya kunchi kena ngubah pengidup lalu nyadi terabai dikena napi pemar dunya mansang dudi hari.

“Aku temegah ati laban bisi dua iku anak Simanggang mujur ba pelajar lalu diatu seduai deka mai nama menua tu ngagai tikas pelajar tinggi.

“Nya alai aku ngarapka seduai tu nyadi chunto lalu nembiak bukai deka nunda singkang seduai, maju ba pelajar sekula,” ku iya madah nyemetak.

Ungkup penerang, Effa ari Rumah Pulang, Lalau deka nampung pelajar ba Palan Pematih Pengajar (IPG) Kampus Rajang (Pengajian Inggeris) seraya Siao Tong ari Kampung Ensebang Kuari ba Universiti Malaysia Kelantan (UMK).

Insentif Pelajar tu sebagai ari program dipejalai Serakup Projek Pensel dikena mantu bala nembiak ti diterima nampung pelajar ba sebarang palan pelajar tinggi menua tu.

Kenu ku Norina, serakup tu ditumbuh dalam tain 2016 enggau tuju ngangkatka tikas pelajar bala nembiak kelebih agi ba kandang menua pesisir enggau menua ulu ti betapi enggau mayuh macham pemar nyengkaum suntuk belanja.

Kelimpah ari nya, serakup sida mega udah nyadung kereban tulis ngagai lebih 1000 iku nembiak sekula primari kelebih agi sida ti napi Ujian Pencapaian Sekolah Rendah (UPSR), kenyau ari ditumbuh.

Norina ngarapka diri ulih ngemansangka pengawa belajar bala nembiak ba menua pesisir nengah program tu lalu nempa rebak ketuai ti bepenau enggau bepelajar jemah.