SARATOK: Tim Ali Biju ari Palan Servis Komuniti Sitak Parlimen Saratok ditu berumban nganjung bantu pemakai ngagai rayat Rumah Bundak Sulaw, Sungai Anak ditu, ensanus.

Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Ali Biju madah, bantu nya dianjung pengudah sida serumah dipinta kuarantin pengelama 14 hari.

Ku iya, sida Rumah Bundak serumah dikuarantin laban bisi kaul semak enggau kes positif Covid-19 ti ditemu nyadi kena 26 Ogos tu tadi.
“Kitai nerima penerang, siku lelaki ditemu positif ari pemutus swap test diambi kena 24 Ogos nyin tadi.

“Kena 17 Ogos, iya bisi pulai kemisi ke Saratok lalu bisi kelai renga kena 24 Ogos ke alai iya lalu beperesa tauka swap test,” ku iya.

Berindik ari nya, Ali berumban ngasuh tim iya nganjung bantu pemakai enggaika sida serumah suntuk pemakai sekumbanh timpuh kuarantin nya.

Ali mega ngarapka sida serumah besabar enggau liat ati napi penguji besai tu lalu besampika sida nadai apa nama.

Berebak enggau nya, Tuai Rumah Bundak meri besai terima kasih ngagai Ali enggau tim iya ti semampai mantu rayat ke tusah.

“Pemanah budi bala kita deka dikenang kami serumah dataika jemah.

“Nadai jaku bukai dikena kami mantaika terima kasih ngagai pemanah enggau jaku sampi bala kita,” ku iya.