Anak setengah nyawa ditimbak apai

MUKAH: Siku nembiak lelaki balat bakal ditimbak apai iya empu dipelaba mabuk sereta charut pengudah sida ngirup ai bisa kena lemai Hari Dua nyin tadi.

Ba penusah nya, nembiak beumur 18 taun enggau apai iya, 48 taun, dipadah betunga ngirup ai bisa ba rumah sida di Kampung Keranji Madu, Selangau, urung 1 kilometer (km) ari Balai Opis Selangau.

Ketuai Polis Pelilih Mukah, DSP Jimmy Panyau madah, polis datai ba endur penusah nyadi urung pukul 5.30 lemai pengudah nerima kangau ari mensia mayuh.

Ku iya, lebuh polis datai dia, nembiak nya agi ngeleda tang balat bakal ba bau kiba, jari enggau patung kanan.

“Selaras senapang patah digaga diri empu tauka bakakok ti ditemu enda jauh ari endur penusah nyadi udah dirampas nyadi barang bukti.

“Nembiak nya ditaban ngagai Klinik Pengerai Selangau sebedau dianjung berubat ngagai Sepital Sibu,” terang iya.

DSP Jimmy madah, nitihka saksi ba endur penusah nya, saspek ke mega apai nembiak nya udah ngelarika diri.

Piak polis diatu chakah nyidi saspek lalu pun penusah nyadi agi dipansik.

Suara Sarawak