Bantu MRP-PPRMS meri pengaga ngagai peranak Segedup, Sg Maong

KUCHING: Peranak Kampung Segedup enggau Sungai Maong ditu gaga nerima bantu di baruh Projek Mit Pemansang Menua Pesisir (MRP)- Program Nyeleti Rumah Rayat Miskin Sarawak (MRP-PPRMS) ti dipejalaika Perintah Sarawak.

Pengari penerima bantu ba Kampung Segedup Hardy Sapiee madah, rumah apai iya Sapiee Son suah tuduh.

“Atap nya suah tuduh enggau enda ulih dikena agi kelebih agi maya hari ujan.

“Aku berasai gaga laban bantu diberi tu ulih mantu kami nukar baru atap rumah tu,” ku iya madah ngagai pemberita ba Program Pejalai Ngabas Projek MRP Dun Satok ari Pating PBB Segedup seharitu.

Hardy mega meri terima kasih ngagai Perintah GPS, Adun Satok ti mega Kepala Menteri Datuk Patinggi Abang Johari Tun Openg, Sapit Ketuai PBB Pampang Dun Satok Datuk Ibrahim Baki enggau bala bukai.

“Kami puas ati enggau bantu tu,” ku iya madahka pengaga ati.

Nangkan nya, penerima bantu ba Kampung Sungai Maong Jaafar Abdullah madah, rumah endur sida sebilik nya entara rumah lama ba genturung pendiau nya.

“Rumah tu rumah niang ini enggau udah nerima bantu nyeleti rumah baka nukar atap, dinding enggau bilik mandi udah diseleti,” terang iya.

Ba lansa sama, Jaafar madahka iya diau ba rumah nya enggau bini sereta lapan iku anak.

Ungkup rikod, MRP-PPRMS ba rumah Sapiee enggau Jaafar berengkah dipejalai kena 12 Julai 2020 enggau deka tembu 12 Oktober tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak