Enti dibai ngagai kort, aku sigi ngelaban – Willie

KUCHING: Kaban Parlimen Puncak Borneo, Willie Mongin madah, iya apin nerima surat saman RM10 juta ari Parti Keadilan Rakyat (PKR).

Ku Willie, iya enda kala nyain sebarang surat setuju lebuh nyemilik PKR.

“Aku sigi tekenyit enti sema nerima surat nya laban aku enda kala nyain sebarang bon tauka dokumen tang nyentuk diatu, aku apin nerima surat nya.

“Enti sida mai pekara tu ngagai kort, aku sigi ngelaban ba kort.

“Ngelama tu aku enda kala nyain sebarang bon enggau parti,” terang iya.

Willie mansutka jaku nya ngagai pemberita pengudah nyuaka chek ngagai Gerija St Francis Xavier di Kampung Seratau, Siburan ditu ensnaus.

Dulu ari nya, Tukang Wang PKR, Lee Chean Chung madah, PKR deka ngeluarka surat saman ngagai 19 Kaban Parlimen ti ningkilka diri ari parti.

Nangkan nya, Willie madahka diri apin nyereta sebarang parti politik diatu tang meri sukung ngagai Perikatan Nasional (PN) ba renggat perintah besai enggau nyukung Gempung Parti Sarawak (GPS) ba renggat nengeri.

Willie mega madah iya seruran nyukung Perintah Besai lalu bekerejasama enggau Perintah Sarawak.

“Aku dekaka kitai seruran bekerejasama ungkup pengelantang rayat lalu maya pengawa bepilih nengeri ke deka datai, kitai deka meri sukung ngagai parti komponen PN plus,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak