Jereki dagang chara online lebih untung

KOTA SAMARAHAN : Sekumbang penyakit Covid-19 ngerekai di menua tu, mayuh pengawa dagang besai tauka mit tejanggal ngujungka bala pedagang enda ulih lari ari kena pangka pengerugi.

Mayuh sebana dibantai bala pedagang nyentukka perintah bisi meri bantu ke patut dikena nulung ngelempung penusah rayat.

Ba siku pedaja Mohd Arif, 31 taun asal ari Kelantan ti bisi muka dagang mit ba Kota Samarahan mega ngasai pangka pengerekai Covid-19.

Tu beduduk ari atur perintah ti bejalai Atur Tagang Pejalai (PKP) suba, ngujungka penatai pemisi Arif balat kusut.

Kepuas ti berunding dia Arif ngaga pemutus bejalaika dagang nengah chara ‘Cash on delivery’ (COD) iya nya nganjung pemakai ngagai rumah orang ti bisi mesan pemakai.

PALAN DAGANG…Palan endur bedaja asi bungkus

“Taja untung enda mayuh dibanding sebedau tu, tang nya agi ulih dikena nupi diri sebilik,” ku iya maya dirandau Suara Sarawak.

Pengudah PKP betukar ngagai Atur Tagang Pejalai Besyarat (PKPB) dia dagang ke dipejalai Arif majak belinsur manah nyangka tu mih jereki asil ari dagang chara online, ku Arif.

Orang ti mesan pemakai nyau majak nambah laban sida udah ngelala sereta nemu servis tu.

Enti sebedau tu Arif semina ulih nyual 150 bungkus asi, tang diatu iya ulih tejualka manggai 400 bungkus dalam sehari.

“Sekumbang PKP nyentuk PKPP mayuh pemakai nya dipesan bala pengajar ba sekula. Tu beduduk ari kantin sekula ti nadai dibuka endur merarau,” ku iya.

Tandu Arif sebedau tu iya semina bejual asi bungkus, tang diatu iya bisi nyual buah nanas, kerupuk ikan Terengganu enggau ikan baru datai ari Telaga Ai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak