Kompleks Lumba Balai Ringin meri pemaik ngagai bala nembiak

Penumbuh Kompleks Lumba Balai Ringin ulih nyeliahka bala nembiak ngaga ulah ti jai baka gian dadah enggau ulai jai ke bukai.

Siku atlet gumpal isi ari Sri Aman, Buda Anchah madahka penumbuh kompleks tu deka nyadi kelai ti pemadu manah ngagai bala nembiak ngaul diri dalam pekara lumba.

“Kompleks lumba tu ulih nyeliahka bala nembiak ngaga ulah ti enda menuku baka gian dadah.
“Kelimpah ari nya, kompleks tu ulih narit mayuh agi nembiak baru ngaul diri dalam pekara lumba sereta mantu sida ngulihka perengkaguna lumba ti meruan,” ku iya lebuh dirandau Suara Sarawak.

Buda ngarapka sebuah gimnasium endur lumba gumpal isi bisi digaga ba kompleks nya ila.
“Ari nya mayuh atlet gumpal isi ulih dipansutka ba sitak tu,” ku iya.

Nangkan nya, siku agi atlet gumpal ari sitak Balai Ringin Philomena Dexclyn madahka penumbuh kompleks tu ila deka meri pangka positif ngagai komuniti.

Buda Anchah

“Penumbuh palan nya ulih narit ati mensia mayuh ti diau ba kandang kompleks nya lebih chakah dalam pekara enggau aktiviti lumba.
“Pia mega, peluang tu tau dikena ngiga nembiak ti besai peluang nyadi atlet,” ku iya.

Philomena madahka iya endang bisi perambu deka belatih ba kompleks nya ila enti udah tembu.

“Udah tentu aku enda sabar nganti kompleks nya tembu laban aku deka belatih dia.

“Aku enda sabar deka ngena perengkaguna ti baru sereta manah ba kompleks nya ila kelimpah bejalaika program pengerai baka Program Hitfat ti digaga aku selama tu ba Stadium Mini, Serian.

“Ngarapka, komples lumba nya ila disikap enggau perengkaguna pemadu baru lalu dijaga manah ungkup pemaik semua kitai,” ku iya.
Ungkup penerang Buda kala nerima midul emas dalam kategori Masters (Umur 40-49, 80 kilogram) ba Pekit Gumpal Isi enggau Lumba Fizikal Dunya kali ke-10 di Chiangmai, Thailand ba taun 2018.

Kelimpah ari nya, Philomena ngubah fenomena orang indu lebuh iya bulih midul pirak ba Pekit Gumpal Isi Entarabansa (Women’s Model Physique) di Yangoon Myanmar taun siti nyin kemari.

Philomena Dexclyn
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak