Kompleks Makmal Pengerai deka digaga ba Batu 11, Kuching

KUALA LUMPUR: Opis Menteri Pengerai Malaysia (KKM) merambu deka ngaga sebuah Kompleks Makmal Pengerai di Batu 11, Jalai Kuching-Serian, Sarawak.

Sapit Menteri Pengerai II Datuk Aaron Ago Dagang madah, renggat keterubah projek tu udah dikemendar di baruh peminta Pelin Besai Keempat Langgur Pemansang Malaysia Lumpar Kesebelas (RP4 RMK-11).

“Skop perambu projek tu mungkur Makmal Pengerai Perintah sereta Makmal Pengelikun enggau Kualiti Pemakai.

“Makmal Pengerai Perintah tu mungkur Makmal Penyakit Berampit ti udah dikena nyidi enggau ngenukuka Covid-19,” ku iya.

Aaron mansutka jaku nya lebuh nyaut tanya Kaban Parlimen Betong Datuk Robert Lawson Chuat pasal perambu numbuhka makmal khas ungkup nyidi penyakit berampit baka Covid-19 ba Sarawak lebuh Aum Kedua, Penggal Ketiga Parlimen Keempat Belas di Putrajaya, ditu ensanus.

Terang iya, Makmal Molekular khas endur nyidi enggau ngenukuka Covid-19 udah beoperasyen ba lima buah sepital di Sarawak iya nya ba Sepital Besai Sarawak (SGH), Sepital Sibu, Sepital Bintulu enggau Palan Tungkul Sengayuh Sarawak.

“Pia mega, dikena nambahka endur beperesa enggau nyidi Covid-19 mega bisi disedia ba Unimas enggau Borneo Medical Centre.

“Semua palan tu ulih meresa 2,226 ngagai sida ti beperesa Covid-19 sehari ba Sarawak,” ku iya.

Ku iya, naka 6 Ogos tu tadi, bisi 91,156 pengawa beperesa Covid-19 udah dipejalai ba Sarawak.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak