MBKS, DBKU bekerejasama nitih peminta rayat

KUCHING: Kenyau 11 bulan ke udah, Kaunsil Bandaraya Kuching Selatan (MBKS) enggau Kaunsi Bandaraya Kuching Utara (DBKU) udah bejalaika atur pemansang baru ti terit enggau nunjukka pengulih Kuching nyadi sebuah menua ti beserakup taja diuan mayuh pupu bansa.

Datuk Bandar Kuching Selatan Datuk Wee Hong Seng madahka MBKS enggau DBKU bekerjasama sereta meretika peminta rayat dalam mantu perintah ke diatu.

“Tiap atur digaga efisyen sereta dipejalai nitihka atur ti udah ditetapka perintah.

“Kami bejalaika pengawa tu nitihka pelasar integriti, akauntabiliti enggau ati ti lurus,” ku iya.

Iya bejaku munyi nya ba Pengerami Ngintu Taun Hari Mengeri Kuching Ke-32 ditu, kemari.

BEKEREJASAMA…Datuk Bandar Kuching Selatan Datuk Wee Hong Seng (kanan) enggau Datuk Junaidi Reduan rambau Pengerami Ngintu Taun Hari Mengeri Kuching Ke-32 ditu, kemari. -Gambar Ramidi Subari

Kenu ku iya, dalam nyapai juluk perintah Sarawak nyapai tuju ekonomi digital, MBKS enggau DBKU mega bisi ngambi bagi.

“Entara inisiatif MBKS iya nya numbuhka ‘i-People Application’ sebuah pelasar digital dikena ngemendarka komunikasyen entara orang Kuching enggau raban MBKS.

“Aplikasyen tu ulih dikena nyampaika jaku balas, gerah, perambu enggau notis entara orang Kuching enggau raban MBKS,” ku iya.

Kelimpah ari nya, iya madahka sida mega bisi numbuhka ‘Smart Traffic System’ berenggat dikena ngurangka penanggul jalai sekut.

“Kami mega bekerejasama ngatur ‘Augmented Reality (AR) ba Bilik Gambar MBKS awakka orang ti datai kitu nemu sejarah menua nengah AR,” ku iya.

Tandu iya, MBKS enggau DBKU mega deka ngatur pengawa nyaga rampa menua gadung (go green) ngambika rampa menua Kuching tetap meruan.

“Kami ngelaluka kerejasama ari bakih strategik baka gerempung ukai dikuasa perintah (NGO), raban komuniti, ketuai komuniti enggau residen dalam mantaika penemu ngintu menua tu.

“Kuching dikearap deka terus nyadi lambang mengeri mansang ba ekonomi enggau pekara bukai awakka status mengeri pintar ulih dijapai,” ku iya.

Hari Mengeri Kuching Ke-32 kemari dipenyadi Kepala Menteri Datuk Patinggi Abang Johari Tun Openg.

Sama bisi datai kemari Sapit Kepala Menteri Datuk Amar Douglas Uggah Embas, Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Menteri Muda ba Opis Kepala Menteri (Pekara Islam enggau DBKU ) Datuk Dr Abdul Rahman Junaidi, Datuk Bandar Kuching Utara Datuk Junaidi Reduan enggau bala bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak