Nadai YB deka meda projek pemansang ditangguh

KUCHING: Nadai pengari rayat (YB) ti bechiping enggau deka nangguh projek pemansang ba sitak diri.
Sapit Menteri Pengawa Bekebun enggau Komoditi, Willie Mongin madah, lebuh nyadi pengari rayat, kami sigi dekaka projek pemansang dipejalai enggau naka pengelengkas.

Terang iya, mayuh agi rayat arap enggau nyukung kami enti projek ulih dipejalai enggau lengkas.

“Nadai kebuah kami deka ngasuh projek tu lubah dipejalai laban endang dipinta kami projek jampat tembu.

“Tang lebuh gawa, kitai endang bisi polisi enggau atur ke mesti dititih.

“Atur birokrasyen tu ngujungka juluk kami mai pemansang lubah dipejalai,” ku iya.

Willie mansutka jaku nya ba Pengawa Nyuaka Chek ngagai Gerija St Francis Xavier di Kampung Seratau, Siburan ditu ensanus.

Ba pengawa nya, Willie udah nyuaka chek penyampau RM80,000 ngagai Gerija St Francis Xavier enggau RM 5,000 ngagai Gerempung Apai Indai enggau Pengajar (PIBG) Sekula Primari (SK)St Francis Xavier.

Iya mega udah nyuaka agih belanja tambah RM4,000 ngagai gerija nya dikena meli 20 iti kipas.

Nambahka nya, iya ti mega Kaban Parlimen Puncak Borneo enda peduli digelar katak.

Willie nyemetak madah, pemutus iya nyereta parti ti numbuhka Perintah Besai ke diatu nya ungkup pengelantang rayat.

Terang Willie, iya ngaga pemutus nya ngambi ulih nampung projek pemansang perintah ke dulu.

“Awak mih aku nyadi katak ngambi meri pengelantang ngagai mensia mayuh laban sida ulih nerima bantu enggau mega pemansang,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak