Nama JKKK enda diubah, sistem udah engkeman

KUCHING: Nama Komiti Pemansang enggau Pengelikun Genturung Pendiau (JKKK) sigi enda diubah taja bisi piak ngasuh ngubah nama nya.

Sapit Kepala Menteri Datuk Amar Douglas Uggah Embas madahka JKKK endang nyata bisi sistem ti udah engkeman.

“Suba maya Pakatan Harapan (PH) ngasuh ngubah nama komiti tu kitai madah enggai.

“Pia mega, lebuh Perikatan Nasional (PN) ngasuh nukar nama JKKK tu kitai mega madah enggai,” ku iya.

Uggah bejaku munyi nya lebuh ditanya pemberita pengudah Pengerami Ngelancharka Program Kepolisan Komuniti ari Komiti Penyaga Penusah Ngenyit Nengeri (JPBN) ba Wisma Bapa Malaysia ditu, kemari.

Kenu ku iya, pengawa dikeraja JKKK udah meruan nya alai nadai kebuah endur sida ngubah nama komiti nya.
“Pekara nyiri kaban komiti pan endang digaga perintah nengeri baka ti digaga sebedau tu,” ku iya.

Iya madahka tanggungpengawa JKKK diatu majak besai empas ari mayuh pekara ti nyadi kemaya hari.

“Nitihka program kepolisan komuniti ti dilancharka sehari tu (kemari), JKKK deka gawa enggau ejensi ti lebih tinggi baka polis, Ejensi Anti Dadah enggau Opis Pengerai.

“Pia mega, sida ulih ngaga ripot ngagai polis enti bisi meda orang tama ngagai kampung nadai pemendar (Pati) baka ti nyadi sebedau tu,” ku iya.

Iya madahka, pengawa ngaga latih program tu deka digaga dalam timpuh dua minggu agi lalu disereta urung 150 ngagai 250 iku sekali latih.

Ba pekara bukai, Uggah madahka pengawa nyiri tuai rumah bepanggai ba penyelai proses sesebengkah kampung.
“Baka penghulu, temenggong enggau pemancha endang perintah nengeri ti nyirika sida.

“Tang bagi tuai rumah, tiap rumah panjai bisi chara kediri endur sida nyiri sapa ti patut dichiri.

“Ba pengujung proses, dia nama chalun tu deka diberi ngagai pemesai pelilih menua (DO).

Kenu ku Uggah, udah nama chalun tuai rumah nya diberi ngagai DO, dia DO nganjung nama nya ngagai opis residen ngambika dikerandau dalam sebuah komiti.

“Komiti ba renggat opis residen tu ti deka ngenukuka nama chalun ngambika ditukuka ngagai sekretari perintah nengeri,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak