Perambu Presiden PDP bediri di Dudong ‘enda engkeman’

SIBU: Presiden Parti Sa’ati Rayat Sarawak (SUPP) Dato Sri Dr Sim Kui Hian ngasaika perambu Presiden Parti Progresif Demokratik (PDP) Dato Sri Tiong King Sing nya chalun ba penuduk Dun Dudong maya Pengawa Bepilih Nengeri Ke-12 (PRN12) nya ‘enda engkeman’.

Sebedau tu, Sapit Presiden Kanan PDP Kaunselor Teo Boon Siew udah merambu Tiong nyadi chalun ba penuduk nya lebuh parti nya ngatur sebengkah pengerami politik di Durin, apin lama ke udah.

Beduduk ari nya, Teo udah nerima mayuh timbal ari piak SUPP Pampang Dudong ti ngasaika perambu nya enda bebasaka SUPP ti asal ngempu penuduk Dun Dudong nya.

“Ukai muntang gawaka rayat ba dua palan,” ku iya lebuh ngelansa pasal perambu Tiong ti mega Kaban Parlimen Bintulu nya.

Dr Sim mansutka jaku nya lebuh dirandau pemberita pengawa ngena Pengawa Angkat Sumpah Sapit Chairman Majlis Daerah Luar Bandar Sibu (MDLBS) Wong Ching Yong ti baru dichiri, ditu kemari.

Ku Menteri Kaunsil Kandang Menua enggau Pengawa Berumaph nya, Gempung Parti Sarawak (GPS) mesti ngembuan kaul ti tegap napi PRN12 ke deka datai.

“Aku udah betemu enggau Kepala Menteri Datuk Patinggi Abang Johari Tun Openg sebedau tu lalu kami udah berandau pasal semua 20 chalun SUPP maya PRN12 tu.

“Pekara tu nunjukka kami udah berandau pasal semua chalun SUPP nyengkaum ba Dun Dudong lalu Abang Johari mega udah nemu pekara tu.

“Nyadi YB tu mai reti kitai gawaka rayat ba sitak nya. Uji kita berunding, aku betanding ba Bintulu enggau diau ba Kuching? Pekara tu deka meri pemar ngagai kitai empu,” ku Dr Sim nyemetak.

Suara Sarawak