Perintah meri agih tambah RM1.4 juta ungkup SJKC Tapah

SERIAN: Sekula Bansa China (SJKC) Tapah nerima agih belanja tambah dikena ngaga blok begunan sekula baru beungkus RM1.4 juta ari Perintah Sarawak.

Kepala Menteri Datuk Patinggi Abang Johari Tun Openg madahka agih tambah nya dikena nulung sekula primari tu ngelengkaska agi pengawa ngaga blok begunan baru ba sekula nya.

“Sida madah ngagai aku tadi udah bulih ngumpul belanja urung RM1.4 juta.

“Nya alai, aku besemaya deka nambah RM1.4 juta agi ungkup sekula nya,” ku iya.

Abang Johari bejaku munyi nya ba Pengerami Bejadika Projek Nyeruri Jalai Padawan Renggat Keterubah Tapah Bagi Menua Serian ditu, kemari.

Dulu ari nya, Adun Tarat Datuk Roland Sagah Wee Inn madahka SJKC Tapah nagit ulih ngumpul RM4 juta dikena ngaga begunan baru sekula nya.

“Kenyau empat tauka lima taun ke udah lalu, sekula tu merambu deka ngaga sebuah agi begunan baru laban blok kelas diatu enda likun.

“Dulu ari nya Kepala Menteri (Abang Johari) udah meri agih belanja RM500,000 ngagai sekula tu kelimpah sida ngumpul belanja bukai.

“Aku ngarapka Kepala Menteri agi ulih mantu sekula tu nyapai tagit sida dikena ngelengkaska pengawa ngaga begunan sekula baru,” ku iya.

Roland mega madah iya berasai temegah ati laban projek nyeruri jalai ti tejanggal tu udah disambung baru.

“Mayuh pekara udah nyadi ngagai projek nyeruri Jalai Padawan tu baka Perintah Besai berubah ti ngujungka pengawa nya tejanggal.

“Taja pia, lebuh Pengerami Hari Gawai ba Kampung Pichin taun siti nyin kemari Kepala Menteri madahka enti orang nadai ulih neruska, Perintah Sarawak empu deka nanggung,” ku iya.

Iya madahka Abang Johari endang siku ketuai ti siruka penusah rayat.

Projek keterubah nyeruri Jalai Padawan tu ngembuan pemesai 6.5 meter sereta 15 kilometer pemanjai beungkus RM34.9 juta.

Diatu projek nya benung dalam 2.3 peratus tembu lalu dipelabaka tembu bulan September 2022.

Pengudah jalai nya tembu diseruri, peranak pelilih Padawan deka muntang agi ngulihka penatai pemisi ba sektor ekonomi, betanam betupi, pengawa berubah enggau dagang temuai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak